Ақтөбеде итті бірнеше рет пышақтап, аяусыз тепкілеген жасөспірім қылмыстық жауапкершілікке тартылмайтын болды, деп хабарлады 31 арнаның Информбюро ақпараттық бағдарламасы.
Полиция бала 14 жасқа толмағандықтан істі тоқтаттық деп отыр.
Мектеп оқушысы Тараз қаласындағы арнайы білім ошағына жіберілуі мүмкін. Түпкілікті шешімді сот шығарады.
Үй жануарына асқан қатыгездік көрсеткен баланың видеосы әлеуметтік желіге жарияланып, жұрт жағасын ұстаған болатын.
Бейнежазбада тоғызыншы сыныптың оқушысы байлаулы итті әбден қинайды. Төбетке бірнеше жерден пышақ сұғып, аяусыз тепкінің астына алады. Ең сорақысы, жеткіншектің әрекетін қасындағы балалар қолдап тұрған.
Аудан әкімдігі жанындағы кәмелетке толмағандар ісі жөніндегі комиссия мүшелері итке қорлық көрсеткен оқушы мен оның ата-анасына қатысты материалдар сотқа жолданғанын жеткізді.
