Алматыда 20-21 қыркүйек күндері Тәжікстан Республикасының Хатлон облысынан келген тауар өндірушілердің қатысуымен ауыл шаруашылығы жәрмеңкесі ұйымдастырылады. Бұл туралы Алматы қаласы әкімдігінің баспасөз қызметі хабарлады.
Жәрмеңке Алатау ауданындағы "Алатау" театрынан (Момышұлы және Универсиада көшелерінің қиылысы) алдындағы автотұрақ алаңында өтеді.
Іс-шараға 40 фермер қатысып, қалаға 200 тоннадан астам жаңа ауыл шаруашылығы өнімін әкелмек. Сауда сөрелерінде маусымдық жеміс-жидек пен көкөніс, табиғи кептірілген жемістер және шығыс тәттілері ұсынылады. Тұрғындар мен қонақтар өнімді тікелей өндірушілерден қолжетімді бағамен сатып ала алады.
Оқи отырыңыз: Татарстан мүфтиі: Жасанды интеллект Құран мәтіндерін бұрмалап жіберуі мүмкін
Әкімдіктің мәліметінше, жәрмеңке Қазақстан мен Тәжікстан арасындағы сауда-экономикалық байланыстарды нығайтуға, фермерлерді қолдауға және тұтынушыларды балғын әрі сапалы өніммен қамтамасыз етуге бағытталған.
Қала билігі алматылықтарды және қала қонақтарын жәрмеңкеге қатысып, фермерлерді қолдауға шақырады.