Қазақстанның Тоғызқұмалақ спорты федерациясының баспасөз қызметі федерация басшылығындағы бірқатар өзгерістер туралы хабарлады.
Атап айтқанда, республикалық федерацияның президенті қызметін атқарған Әлихан Байменов енді ұйымның құрметті президенті болып бекітілді. Ал оның орнына федерация президенті болып Әкім Тұрсұн сайланды. Ол бұған дейін федерацияның вице-президенті қызметін атқарып келген еді.
Федерацияның басшылық құрамында бұдан басқа да өзгерістер болды. Атап айтқанда, федерацияның вице-президенттері лауазымына Батырбек Құлекеев, Шолпан Қадырова, Мақсат Шотаев, Дәулет Әбдікәрімов сайланды. Мақсат Шотаев вице-президенттікпен бірге Дүниежүзілік тоғызқұмалақ федерациясында бас хатшы қызметін атқарады.
Ал ҚР Тоғызқұмалақ спорты федерациясы PR директоры лауазымына журналист Ришат Асқарбекұлы тағайындалды.
Оқи отырыңыз: "Ұлттық ойын атауы парламентке тиесілі емес". Бәйменов депутаттың тоғызқұмалақ атауын өзгерту ұсынысына жауап берді
Айта кетейік, Әлихан Байменов республикалық федерацияны 2004-2025 жылдары басқарды. Сондай-ақ, ол – Дүниежүзілік тоғызқұмалақ федерациясының президенті. Ал оның Қазақстанның Тоғызқұмалақ спорты федерациясының құрметті президенті ретіндегі жаңа қызметі – қоғамдық негіздегі жұмыс болып саналады.
Еске салайық, Әлихан Байменов 17 қаңтарда Астана мемлекеттік қызмет хабы Басқарушы комитетінің төрағасы ретінде мемлекет басшысының қабылдауында болды. Президент Астана мемлекеттік қызмет хабы елімізде жүргізіліп жатқан реформаларға тұрақты сараптамалық қолдау көрсетіп келе жатқанын атап өтіп, айтылған ұсыныстар бойынша тиісті мемлекеттік органдармен тығыз жұмыс істеуді тапсырды.
Оқи отырыңыз: Токаев принял председателя управляющего комитета Астанинского хаба госслужбы Алихана Байменова
