Қазақстанда мамандандырылған мектептердің саны 134-ке жетті, деп хабарлады Оқу-ағарту министрлігі. Ведомство мәліметінше, бұл мектептерде 72 мыңнан астам оқушы білім алса, олармен 8 мыңнан астам педагог жұмыс істейді.

  • 94 мектеп жаратылыстану-математика;
  • 6 мектеп қоғамдық-гуманитарлық;
  • 8 мектеп көпсалалы;
  • 5 мектеп әскери спорт;
  • 6 мектеп музыкалық-эстетикалық бағытта жұмыс істейді.

134 мектептің 95-інің интернат үйі бар. Ал 15 мектепке Абай Құнанбаев есімі берілген.

Оқи отырыңыз: Мектеп директоры қай жағдайда екі есе жалақы алады? Оқу-ағарту министрлігінің жауабы

"Дарынды балалар республикалық және халықаралық олимпиадаларға белсене қатысып, жеңіс тұғырынан көрініп жүр. Мысалы, былтыр 420-дан астам оқушы республикалық олимпиадалардың жүлдегері мен жеңімпазы атанды", – деді "Дарын" республикалық ғылыми-практикалық орталығының директоры Әнуар Унайбеков.

Оқу-ағарту министрінің бұйрығы бойынша, бұл мектептерге оқушылар тек конкурс негізінде қабылданады. Емтихан барысында оқушылар математикалық сауаттылық пен оқу сауаттылығы, Қазақстан тарихы бойынша үздік нәтижеге жетуі қажет.