SITA, Amadeus және Араб әуе тасымалдаушыларының ұйымы (ААСО) әр рейстегі парник газдары шығарындыларын (GHG) есептеудің тәсілдерін зерттеу үшін бірлескен жобаны жүзеге асырады, деп хабарлады SITA баспасөз қызметі. Бұл жобаның мақсаты – әуе сапарларының экологиялық әсері туралы мәліметтердің ашықтығы мен дәлдігін арттыру арқылы әуе компаниялары мен жолаушыларға барынша салмақты таңдау жасауға көмектесу. 

"Бұл бірлескен жоба әуе компаниялары мен жолаушыларға әуе сапарларының қоршаған ортаға әсері туралы деректерді ұсыну және климаттың өзгеруімен күрес бойынша тиімді шаралар қабылдау үшін қажет сенімді нығайтады. Бұл ретте цифрлық шешімдерді әзірлеумен айналысатын екі жетекші компания саланың алдында тұрған міндеттің ауқымы мен маңыздылығын ескере отырып, бірлесіп жұмыс істейтінін мәлімдеді", – делінген ресми хабарламада. 

Жоба аясында әуе кемелерінің ұшу сипаттамалары мен операциялық қызметінің нақты деректеріне сүйене отырып, шығарындылар мен жанармай тұтынуын дәл есептейтін SITA Eco Mission құралы танымал көздер мен халықаралық стандарттар бойынша көміртек шығарындыларын есептеуді біріктіретін Amadeus Travel Impact Suite платформасымен біріктірілді. 

Бұл шешімдер бірге авиациялық экожүйені егжей-тегжейлі шығарындылар деректерімен қамтамасыз етіп, жолаушыларға саналы сапарлар жасауға мүмкіндік береді. Олардың ортақ мақсаты – дәл деректердің тұрақты ұшулар мен климаттық бастамаларды, соның ішінде көміртекті өтеу шараларын қолдауға қалай ықпал ететінін көрсету.

"Amadeus пен SITA авиация саласы мен оның клиенттеріне операциялық шығындарды оңтайландыруға көмектесетін және деректердің ашықтығы арқылы жолаушыларды тұрақты даму тақырыбына тартатын шешімдерді бірлесіп әзірлеумен айналысып жатқанына біз қуаныштымыз. Amadeus пен SITA – сенімді технологиялық серіктестер, олардың бірлескен шешімдері экологиялық тұрақтылықты арттыруда және әуе компаниялары мен олардың жолаушылары арасындағы өзара сенімді нығайтуда маңызды қадам болады", – деді AACO бас хатшысы Абдул Вахаб Теффаха.

SITA for Aircraft бас директоры Янн Кабаренің айтуынша, бұл бастама – дәл қазір салаға қажет ынтымақтастық рухының көрінісі болып отыр. 

"Жолаушылар мен әуе компаниялары арасындағы сенім ашықтықтан басталады. Amadeus технологиялық шешімдерін біздің операциялық деректерімізбен біріктіре отырып, расталған деректердің экологиялық есептіліктің анықтығына деген сенімді қалай арттыра алатынын зерттеп жатырмыз. Бұл – саланың жетекші ойыншылары нақты прогресс үшін күш біріктіре алатынын көрсететін маңызды алғашқы қадам", – деді ол.

Ал Amadeus компаниясының Еуропа, Таяу Шығыс және Африка өңірі бойынша басқарушы директоры әрі Travel Unit атқарушы вице-президенті Махер Кубаа бұл әріптестік саланың шығарындылар жөніндегі тағы бір сенімді дереккөзге ие болуына мүмкіндік беретініне тоқталды.

"Осылайша, тұрақты даму шешімдері нақты әрі ашық ақпаратқа сүйенеді. Біз расталған операциялық деректерді Travel Impact Suite ашық тәуелсіз платформасына қалай енгізуге болатынын зерттеп жатырмыз. Бұл әуе компанияларына, агенттіктерге, компаниялар мен жолаушыларға әрбір рейстің экологиялық ізі туралы тереңірек түсінік береді. Нәтижесінде олар қандай рейсті брондау және қандай климаттық шаралар қабылдау керегін саналы түрде шеше алады", – деді ол.

Бірлескен бастама деректерді, операциялық шешімдерді және жолаушыларды тарту механизмдерін біріктіру тұрақты даму мақсаттарын нақты әрі өлшенетін нәтижелерге айналдыруға қалай көмектесетінін көрсетеді. Ол реттеудің күрделенуі мен шығындардың өсуі жағдайында әуе компанияларын қолдай отырып, саланың ортақ мәселелерін шешудегі ынтымақтастықтың маңыздылығын айқындайды.

Оқи отырыңыз: