Тікелей эфир

МӘМС: Кімдер тісін тегін емдете алады?

Тіс жұлу, пломба салу, пульпит пен периодонтитті емдеу, рентгенге түсіру секілді қызметтер тегін.

Тіс емдеу арзан тұрмайды, дегенмен Қазақстанда халықтың жекелеген санаты медициналық сақтандыру арқылы тегін стоматологиялық көмек ала алады. Informburo.kz кімдер тісін тегін емдете алады және қандай стоматологиялық қызметтер тегін деген сауалдарға жауап береді.

Медициналық сақтандыру арқылы халықтың жекелеген санаты шұғыл және жоспарлы түрде тісін тегін емдете алады. Бұрынғыдай тіркелген емханаға бару міндетті емес. Науқасты Әлеуметтік медициналық сақтандыру қоры келісім жасасқан кез келген стоматологиялық клиника қабылдайды.

Шұғыл көмек науқастың өміріне қауіп төндіретін кенеттен өткір аурулар туындағанда және созылмалы аурулар ушыққанда стационарда көрсетіледі. Стоматолог амбуториялық жағдайда көмек бере алмаса, науқасты жедел жәрдеммен ауруханаға жіберуге құқылы. 


Оқи отырыңыз: Балаларға қандай медициналық көмектер тегін көрсетіледі? Маңызды 10 сұраққа жауап


Жоспарлы көмек профилактикалық іс-шараларды жүргізу кезінде, ауру науқастың өміріне қауіп төндірмесе және шұғыл медициналық көмекті қажет етпеген кезде көрсетіледі. Мұны 18 жасқа дейінгі балалар мен жүкті әйелдерге ғана пайдалана алады. Ал шұғыл стоматологиялық көмек кепілдендірілген тегін медициналық көмек пакеті шеңберінде, халықтың әлеуметтік жағынан аз қорғалған санаттарына ғана көрсетіледі. Олар:

  • балалар;
  • жүкті әйелдер;
  • Ұлы Отан соғысының ардагерлері;
  • 1, 2, 3 топтағы мүгедектер;
  • "Алтын алқа", "Күміс алқа" иегерлері;
  • атаулы әлеуметтік көмек алушылар;
  • зейнеткерлер;
  • жұқпалы және әлеуметтік маңызы бар сырқаттармен ауыратын науқастар;
  • мүгедек баланы немесе бала кезінен бірінші топтағы мүгедекті күтушілер (жұмыссыз).

Медициналық сақтандырудың стоматологиялық қызметтер пакетіне мыналар кіреді:

  • терапевтің қабылдауы;
  • тісті жансыздандыру және хирургиялық жолмен жұлу;
  • химиялық пломба салу;
  • абсцесстерді ашу;
  • пульпит пен периодонтитті емдеу;
  • гипоплазия, флюороз кезінде тістің анатомиялық пішінін толық функционалдық қалпына келтіру;
  • еріндер мен тілдердің пластикасы;
  • рентгенография;
  • ортодонтиялық қызметтер: жақ-бет аймағының туа біткен патологиялары және таңдайдың бөлінуі (қасқырдың аузы) болған кезде.

Оқи отырыңыз: Міндетті әлеуметтік медициналық сақтандыру жүйесіндегі өзгерістер. Маңызды 13 сұраққа жауап


"Тіс дәрігерінің қызметіне жүгіну үшін стоматологиялық клиникаға хабарласып, қабылдауға жазылған дұрыс. Стоматологиялық көмекті емхана арқылы ғана емес, медициналық сақтандыру жүйесіне тіркелген жеке меншік тіс клиникалары арқылы да алуға болады. Шұғыл стоматологиялық көмек алу үшін учаскелік дәрігердің жолдамасы қажет емес", – деді Алматы Қоғамдық денсаулық сақтау басқармасының емдеу-профилактикалық қызмет бөлімі жетекшісі Ләйла Иманғалиева.

Стоматологиялық көмек алу үшін емханаға да, стоматологиялық клиникаға да жүгіне аласыз. Міндетті шарт – стоматологиялық клиника ӘМСҚ жеткізушілерінің деректер базасында болуға тиіс. Олардың тізімін мына жерден көруге болады. Қазақстанда жалпы 670 медицина ұйымы медициналық сақтандыру бойынша стоматологиялық қызметтер көрсетеді. Оның ішінде 353-і – жеке, 287-сі – мемлекеттік ұйым. Қандай клиникаға баратынын әр адам өзі шешеді.

Біздің Telegram-каналдағы ең көп оқылған жаңалықтар
Серіктестер жаңалықтары