"Нұрлы жер" тұрғын үй бағдарламасына пәтер кезегінде тұрған отбасылардан өтініш қабылдау басталды

12 сәуір 2021, 12:00 Айдана Мейрамбайқызы Авторға хат жазу قازاقشا Qaz

Өтініштер 12 сәуірден 26 мамырға дейін қабылданады.

"Отбасы банк" АҚ тұрғын үйге мұқтаж ретінде жергілікті атқарушы органдарда есепте тұрған азаматтардан Тұрғын үй-коммуналдық дамудың 2020-2025 жылдарға арналған "Нұрлы жер" мемлекеттік бағдарламасына қатысуға өтініштер қабылдаудың басталғаны туралы хабарлады.

Бағдарламаға қатысудың 6 қадамы:

банктің www.hcsbk.kz сайтында электрондық өтініш беру;
өтініштерді қабылдау аяқталғаннан кейін келесі жұмыс күні, егер Сіз берген өтініш үміткерлердің негізгі тізіміне кіретін болса, іріктеуге шақыру үшін банктен қоңырау күту;
белгіленген күні және уақытта төлем қабілеттілігін бағалауға қажетті құжаттар пакетімен банк бөлімшесіне келу;
қарызды мақұлдау туралы банктің оң шешімін алу;
банктің талаптарына сәйкес келетін тұрғын үйді табу немесе банктің жылжымайтын мүлік порталында тұрғын үйді брондау және жылжымайтын мүлікті бағалау;
банктен қарыз алу.

Оқи отырыңыз: Бүгіннен бастап "Ұмай" әйелдер ипотекасы іске қосылды. Оның шарттарымен таныстырамыз

Ескере кету керек, өтініш берушінің жинақ шотында қарыз сомасының кемінде 10%-ы мөлшерінде болған кезде қарыз берілуі мүмкін.

Негізгі тізім бойынша өтініштерді қабылдау мерзімі аяқталғаннан кейін банкте бағдарлама аясында кредит беруге арналған қаражат бар болған жағдайда, сондай-ақ негізгі тізімнен қатысуға өтініштер жойылған жағдайда, резервтік тізімдегі ЖАО-да кезекте тұрғандар бағдарламаға қатысуға шақырылуы мүмкін.

ЖАО-да кезекте тұрғандар ретінде есепке қою күнін сіз egov.kz сайтында немесе өзіңіздің аймағыңыздағы жергілікті атқарушы органда тексере аласыз.

Өтініш берушілерге қойылатын талаптармен Банктің www.hcsbk.kz интернет-ресурсындағы "Қолжетімді баспана" бөлімінде толығырақ танысуға болады.

Оқи отырыңыз: