Үндістан Марсты зерттеу миссиясына қабілетті екенін дәлелдеді

Ғарыш саласындағы бәсекелестіктің күшеюі Үндістанға тек текетіреске емес, ынтымақтастыққа негізделген жаңа халықаралық серіктестік моделін қалыптастыруға мүмкіндік беріп отыр. Бұл туралы Үндістанның бұрынғы елшісі Гурджит Сингх жазды.

Оның пікірінше, сенімді әрі экономикалық тиімді ғарыш державасы ретінде қалыптасқан Үндістан технологиялық жетістіктерін ғылыми прогреске, экономикалық өсімге және тұрақты дамуға бағытталған ұзақ мерзімді халықаралық серіктестікке айналдыра алады.

Үндістанның ғарыш бағдарламасы алғашында ұлттық даму құралы ретінде қалыптасты. Ғалым Викрам Сарабхайдың бастамасымен спутниктік технологиялар байланыс жүйесін жетілдіру, ауа райын болжау, табиғи апаттардың салдарын басқару, денсаулық сақтау, ауыл шаруашылығы және білім беру салаларында қолданылды. Бұл бағыт бүгінде де Үндістанның ғарыш саясатының маңызды бөлігі саналады.

Соңғы жылдары елдің ғарыштағы мүмкіндіктері айтарлықтай кеңейді. Chandrayaan ай бағдарламасы, Марсты зерттеу миссиясы, Aditya-L1 күн обсерваториясы және болашақтағы Gaganyaan пилотталған ғарыш бағдарламасы Үндістанның күрделі ғарыш миссияларын жүзеге асыру қабілетін көрсетті. Ал Chandrayaan-3 аппаратының Айдың оңтүстік полюсіне жақын жерге сәтті қонуы елдің жетекші ғарыш державаларының қатарына қосылғанын аңғартты.

Автор әлемдік ғарыш экономикасының да қарқынды дамып келе жатқанын атап өтті. Қазір оның көлемі 600 млрд доллардан асады, ал 2035 жылға қарай 1,8 трлн долларға жуықтауы мүмкін. Спутниктік байланыс, Жерді қашықтан зондтау, навигация, климаттық қызметтер және орбитада ғарыш аппараттарына қызмет көрсету сияқты бағыттарға сұраныс артып келеді.

Үндістан 2020 жылы ғарыш секторын жекеменшік компанияларға ашып, саланы реформалай бастады. IN-SPACe орталығының құрылуы, NewSpace India Limited компаниясының коммерциялық рөлінің кеңеюі және жеке кәсіпкерліктің дамуы елде жаңа ғарыштық экожүйенің қалыптасуына ықпал етті. Skyroot Aerospace, Pixxel және Agnikul Cosmos сияқты үндістандық стартаптар зымыран тасығыштар, спутниктік платформалар және геокеңістіктік технологиялар әзірлеп жатыр.

Гурджит Сингхтің пікірінше, Үндістанның келесі қадамы – осы экожүйені халықаралық деңгейге шығару. Ел спутник ұшыру қызметтерін ғана емес, спутниктерді жобалау, миссияларды басқару, жерүсті станцияларын пайдалану, астронавтарды даярлау және ғарыш технологияларын ауыл шаруашылығы, табиғи апаттардың салдарын жою мен теңіз қауіпсіздігінде қолдану бағыттарын қамтитын кешенді серіктестік ұсына алады.

Үндістан бұған дейін де ғарыш саласындағы ынтымақтастықтың дипломатиялық әлеуетін көрсетті. Ел Оңтүстік Азия спутнигі жобасы аясында көршілес мемлекеттерге байланыс және даму мүмкіндіктерін ұсынды. Үндістан зымырандары әлемнің әр түкпіріндегі мемлекеттік, университеттік және коммерциялық операторларға тиесілі жүздеген спутникті орбитаға шығарды. Сондай-ақ ел NASA, Еуропалық ғарыш агенттігі және JAXA-мен ынтымақтастық орнатып, ғылыми-технологиялық әлеуетін күшейтіп келеді.