Тауда от жаққандарға 300 мың теңгеге дейін айыппұл салынады

Алматыдағы тексеріс кезінде мамандар таулы жерде от жағудың 39 жағдайын алдын алды. Сондай-ақ, таулы-орманды жерлерде өрт қауіпсіздігі ережелерін бұзғаны үшін 21 адам жауапқа тартылды, деп хабарлайды қалалық төтенше жағдайлар департаментінің баспасөз қызметі.

"Рейд барысында табиғат аясында демалушыларға 10 мыңға жуық жадынама таратылды. Мұнымен қатар, 21 адам әкімшілік жауапкершілікке тартылып, екеуіне 76 575 теңге көлемінде айыппұл салынды", – делінген хабарламада.

Орман шаруашылығы мекемелері мен табиғатты қорғау полициясының қызметкерлері қорғалған аумақтарда от жаққандарға 30 мыңнан 306 300 теңгеге дейін айыппұл сала алады.

---

Оқи отырыңыз: Алматы облысында 3 млн теңгеге егілген ағаштар қурап қалды

---

 "Демалушылардан тұтанған темекіні құрғақ шөпке тастамау, от жақпау және ашық отты пайдаланбауды, шыны сынықтарын және басқа да қоқыстарды қалдырмауды сұраймыз. Сонымен қатар, Медеу ауданындағы Медеу табиғи паркінде және Наурызбай ауданындағы Ақсай шатқалында от жағуға болмайды", – деп ескертті мамандар.