Солтүстікке 10-20 отбасын көшірген кәсіпкерге мемлекеттік қолдау көрсету ұсынылды

Мәжіліс депутаты Елнұр Бейсенбаев Nur Otan партиясы жанындағы Әлеуметтік мәселелер жөніндегі республикалық қоғамдық кеңесі "Еңбек" бағдарламасы аясында оңтүстіктен солтүстікке қоныс аудару кезінде туындайтын мәселелер талқыланғанын хабарлады. Отырыста Парламент депутаттары, құзырлы мемлекеттік органдар, үкіметтік емес ұйымдардың өкілдері, сарапшылар бірқатар маңызды ұсыныстар айтқан.

Мәселен, көшіп барушылардың басым көпшілігі ауыл шаруашылығы бойынша жұмыс атқарғысы келетіндіктен, логистикасы дамыған елдімекендерден жылыжайлар мен мал бордақылау алаңдарын салу үшін оңтүстіктің кәсіпкерлеріне пайызы төмен, жеңілдетілген несиелер, субсидиялар, гранттар берілуі қажет. Сондай-ақ, жергілікті атқарушы органдармен жасалған әлеуметтік келісімшарттың талаптары сақталған жағдайда, жастарды, оның ішінде некеде тұрғандарды баланстық құнның қалдық құнымен 5 жыл өткеннен кейін жекешелендіру құқығымен пәтерді жалға беру ұсынылды.

---

Оқи отырыңыз: Солтүстік өңірлерге қоныс аударғандардың 30 пайызы – Түркістан облысының азаматтары

---

"Солтүстік пен шығыстағы ауылдарды көріп, жағдайымен танысып қайту үшін азаматтарға бір реттік жолақы қаржы қарастыру керек. Қазір бұл мәселе демеушілер арқылы шешілуде. Оңтүстік өңірдегі ірі кәсіпкерлер мен іскер азаматтарға солтүстіктен шаруашылық мақсаттағы жерді жалға беру ісін жандандыру қажет. Егер бір кәсіпкер 10-20 отбасыны көшіріп, оларды жұмыспен қамтыса, мемлекеттік қолдаулар көрсетілуі тиіс", – делінген Мәжіліс депутатының әлеуметтік желідегі жазбасында.

Сонымен бірге, ішкі көші-қонды үйлестіруге арналған тікелей желі, республикалық сайт ашып, барлық мәліметтерді бір базаға жинақтау керек. Әрбір көшуге ниетті адам өз үйінде отырып, сол сайт арқылы бос жұмыс орындары, ауылдар, ондағы инфрақұрылым және өзге де мәліметтерді біліп отыруына жағдай жасалуы тиіс.