Алматыдағы жер сілкінісі кезінде азаматтар дер кезінде ақпарат пен нақты іс-қимыл алгоритмінің жоқтығынан дүрбелеңге түсті, деп хабарлады Премьер-Министр Әлихан Смайылов үкімет отырысында.
Ол атап өткендей, оқиғаға Төтенше жағдайлар министрлігінен бастап әкімдік пен басқа да мемлекеттік органдарға дейінгі барлық қызметтер ден қойды.
"Бақытымызға орай, қаза болғандар мен ауыр зардап шеккендер болған жоқ, бірақ зардап шеккендер бар. Дер кезінде хабар алмаған және нақты әрекеттері жоқ адамдар үрейленді. Олар екінші немесе үшінші қабаттан секірген кезде зардап шекті. Бұл ескерту жүйелерін дер кезінде қосып, халыққа хабарлама жіберуді қосу қажет екенін көрсетеді", – деді Әлихан Смайылов үкімет отырысында.
Премьер-Министр мұндай жағдайларда азаматтардың әрекеттерінің реттілігі туралы нақты хабарлау қажеттігіне назар аударды.
Оқи отырыңыз: Алматыда жер сілкінісі кезінде неге дабыл ойнамады?
Оның айтуынша, сондай-ақ тұрғындар іс-әрекет алгоритмін іс жүзінде білуі үшін барлық жер сілкінісі қаупі бар аймақтарда жаттығуларды мүмкіндігінше жиі өткізу қажет.
"Облыс әкімдіктері мүдделі мемлекеттік органдармен бірлесе отырып, мұндай төтенше жағдайларды жою және алдын алу бойынша іс-шаралар жоспарын түзетуі қажет. Жақында жедел ден қою үшін басқару органдарының және азаматтық қорғау күштерінің басшылары мен жауапты тұлғалары кезекшілікке қойылады. Бұл барлық тіршілікті қамтамасыз ету ұйымдарына қатысты", – деп толықтырды Әлихан Смайылов.
