Тікелей эфир

Республика күніне орай табысы аз астаналықтарға 4,5 АЕК мөлшерінде көмек беріледі

Бұрын астаналықтар бұл көмекті 1 желтоқсан – Тұңғыш президент күніне орай алатын.

Астана қаласының әкімдігі әлеуметтік көмек көрсету, оның мөлшерлерін белгілеу және мұқтаж азаматтардың жекелеген санаттарының тізбесін айқындау қағидаға өзгерту енгізуді жоспарлап отыр. Атап айтқанда, өзгертулер саны екеу:

  1. Табысы аз азаматтарға 4,5 АЕК мөлшеріндегі көмек бұрын 1 желтоқсан – Тұңғыш президент күніне орай беріліп келсе, енді 25 қазан – Республика күніне орай үлестіріледі. Бұл көмекті алу үшін Астана тұрғындарына өтініш берудің қажеті жоқ. Көмек алатын азаматтардың тізімін Астана қаласының әкімдігі әзірлейді. Көмек мөлшері 2023 жылы 15 525 теңгені құрайды. 
  2. Өмірлік қиын жағдайға тап болған азаматтарға берілетін әлеуметтік көмек мөлшерінің жоғарғы шегі 13 АЕК-тен 20 АЕК мөлшеріне (2023 жылы – 69 мың теңге) дейін арттырылды. Ал нақты көмек мөлшері өтініш берушінің шығындарының негізінде анықталады.

Оқи отырыңыз: 2023 жылы зейнетақы мен жәрдемақы қанша теңге болады?


Еске салайық, екінші тармақ бойынша көмекті келесі санаттағы азаматтар алады:

  • егде жасына, ауруына, мүгедектігіне байланысты өзіне күтім жасай алмайтындар;
  • дене не ақыл-ой мүмкіндіктеріне байланысты организм функцияларының тұрақты бұзылуы бар адамдар;
  • әлеуметтік мәні бар аурулардың және айналасындағыларға қауіп төндіретін аурулардың салдарынан тыныс-тіршілігі шектеулі адамдар;
  • бас бостандығынан айыру орындарынан босатылғандар;
  • пробация қызметінің есебінде тұрғандар.

Құжат жобасы Ашық НҚА порталында 29 желтоқсанға дейін қоғам талқысына ұсынылған. 

Бұл мақала сізге пайдалы болды ма?
0

  Егер мәтінде қате болса, оны белгілеп, Ctrl+Enter батырмасын басыңыз

  Егер мәтіндегі қатені смартфонда көрсеңіз, оны белгілеп, «Қатені хабарлау» батырмасын басыңыз

Біздің Telegram-каналдағы ең көп оқылған жаңалықтар
Серіктестер жаңалықтары