Ресейдің Қорғаныс министрлігі әуе апатының алдын ала себептерін анықтады.
Қырым аумағында ресейлік Ан-26 әскери-көлік ұшағы апатқа ұшырап, 29 адам көз жұмды. Бұл туралы ресейлік БАҚ хабарлады.
Алдын ала мәліметтерге сәйкес, ұшақ жоспарлы ұшу кезінде радардан жоғалып, байланысқа шықпай қалған. Ресей Қорғаныс министрлігінің дерегінше, апат орны анықталған.
Қайғылы оқиға салдарынан борттағы 6 экипаж мүшесі мен 23 жолаушы түгел қаза тапты. Алдын ала себеп ретінде техникалық ақау аталып отыр. Ведомство мәліметінше, ұшаққа сыртқы соққы немесе шабуыл белгілері анықталмаған.
Қазіргі уақытта апат орнында Ресей Қорғаныс министрлігінің арнайы комиссиясы жұмыс істеп, оқиғаның мән-жайын анықтауда.
