Автосарапшылар Қазақстанның автонарығында Қытай көліктерінің саны артады деген болжам жасап отыр. Қазірдің өзінде қазақстандықтар арасында шығыстағы көрші елдің көліктеріне сенім артқан. Бұл туралы 31 арнаның Информбюро ақпараттық бағдарламасы хабарлады.
Автосарапшы Алексей Алексеевтің айтуынша, Ресейдегі фольксваген, лада, рено сияқты маркалы көліктерді шығаратын зауыттар жұмысын тоқтатқаннан кейін көрші мемлекеттің азаматтары көлікті Қазақстаннан сатып алып жатыр. Ал бұл жағдайды Қытайдың көлік зауыттары барынша ұтымды пайдалануға тырысады. Өйткені, олар тапшылық туындаған көлік нарығына өз өнімдерін жеткізуді көздейді.
"Ресейдегі қазіргі жағдайға байланысты Қазақстанда көлік тапшылығы болып жатыр. Менің ойымша, елдегі көлік нарығында Қытай машиналары жақын арада көбейеді. Олар осында құрастырылып, отандық өнім болып тұтынушыға ұсынылуы да мүмкін", – дейді Алексеев.
Оқи отырыңыз:
- Утиль алымының азаюы vs доллардың қымбаттауы: Көлік арзандай ма?
- Жеңілдетілген автонесие: Көлік бәріне жете ме?
Мамандар Қытай көліктері Қазақстан нарығында көбейсе, ол темір тұлпарлар көпшіліктің сұранысына ие болатынын топшылап отыр. Оның өзіндік себебі бар екен.
"Қазақстандағы тұтынушылар Қытай көліктеріне ақырындап сене бастады. Менің ойымша, Қытай долларға бағынышты емес. Сондықтан, олар бағаны жиі көтере бермейді. Ендеше, арзан әрі қолжетімді өнімді неге алмасқа", – дейді автожурналист Роман Масленников.
