Елдегі университеттер дебат турнирлерінің жеңімпаздарына грант береді, деп хабарлады Elorda.info.
Білім грантын Қорқыт ата атындағы университеті, Сәрсен Аманжолов атындағы ШҚУ, Халел Досмұхаметов атындағы Атырау университеті, Тұран университеті, Satbayev University және Нархоз университеттері ұсынды. Сондай-ақ, турнирлерге қатысқаны үшін жастар грамота, кубок және 200 мыңнан 500 мың теңгеге дейін ақшалай сыйлықтармен марапатталады.
Бүгінгі таңда елде 120 944 адамды қамтитын 6 778 дебат клубы бар. Олардың арасында оқушылар да, студенттер де бар.
Оқи отырыңыз: Әлеуметтік жобаларға 1 млн теңге грант беріледі. Кімдер қатыса алады?
Қазақстанда оқушылар мен студенттердің дебат қозғалысы белсенді түрде дамып келеді. Екі жыл бұрын 4 405 мектеп және студенттік клубта 66 186 пікірсайысшы болса, бүгінде олардың саны 120 мыңнан асты. Олар сындарлы талқылау өнерін үйренеді, басқа дебатшылармен достық және сыйластық қарым-қатынас орнатады. Сондай-ақ, олар ой-өрісін кеңейтіп, шығармашылық белсенділіктерін арттырады. Биыл балалар жылы аясында бес дебат турнирі ұйымдастырылады.
"Бүгінгі күні оның екеуі өткізілді. Оларға 500-ге жуық оқушы мен студент қатысып, кәмелетке толмағандарды оқыту, тәрбиелеу және олардың құқықтарын қорғаудың маңызды мәселелерін көтереді. Пікірсайыс қозғалысын дамыту мақсатында Білім және ғылым министрлігі дебат қозғалысының жобалық кеңсесін құрды. Бұл қозғалысты кеңінен насихаттау мақсатында әлеуметтік желілерде ақпараттық-түсіндіру жұмыстары белсенді жүргізіліп жатыр. Жаңа мектепішілік дебат клубтары құрылып, облыстық және аудандық деңгейде үйлестірушілер анықталды, түрлі кездесу, дөңгелек үстел, вебинар өткізіліп жатыр", – деп түсіндірді БҒМ республикалық қосымша білім беру оқу-әдістемелік орталығының директоры Раиса Шер.
Елде оқушыларды дебат өнеріне баулитын 100-ден астам маманнан тұратын тәжірибелі пікірсайысшылар пулы құрылды. Сонымен қатар, колледждер мен мектептерде дебат клубтарына көмектесу үшін студент десантшылар құрылып жатыр.
Педагогикалық жоғары оқу орнының барлығы еріктілер топтарын құрып, мектептерде тренингтер мен шеберлік сабақтарын өткізеді, турнирлерді ұйымдастыру кезінде волонтерлік көмек көрсетеді.
Оқи отырыңыз: "Дарын" мемлекеттік жастар сыйлығына байқау жарияланды
