Ақтау – Шымкент бағытындағы пойызда шетелдік туриске жөнсіз тиіскен Маңғыстау облысының тұрғыны әкімшілік жауапкершілікке тартылды, деп хабарлайды Lada.kz.
Көліктегі полиция департаментінің мәліметінше, 8 шілде күні Ақтау қаласының Мамандандырылған әкімшілік құқық бұзушылықтар жөніндегі соты ер адамды ұсақ бұзақылық жасағаны үшін кінәлі деп таныды.
"Сот шешімімен оған 20 айлық есептік көрсеткіш көлемінде, яғни 86 500 теңге айыппұл салынды. Іске негіз болған оқиға шетелдік туристің әлеуметтік желідегі видеосынан кейін белгілі болды. Саяхатшы Қазақстандағы 40 сағаттық пойыз сапары туралы әсерімен бөлісіп, жол бойы бір жолаушының өзін бірнеше рет орынсыз әзілдеп мазалағанын айтқан", – делінген хабарламада.
Оқи отырыңыз: Алматы облысында Түрген өзені тасыды: туристік аймақтардан адамдар эвакуацияланып жатыр
Туристің сөзінше, әлгі азамат оны рұқсатынсыз ұялы телефонға түсіріп, жергілікті тілде балағат сөздер айтқан.
Бейнежазба жарияланғаннан кейін көліктегі полиция қызметкерлері ер адамның жеке басын анықтап, жиналған материалдарды сотқа жолдаған.
Сот оның әрекетін ұсақ бұзақылық деп танып, әкімшілік жаза тағайындады.