Қазақстан мұсылмандары діни басқармасының Ғұламалар кеңесі энергетикалық сусындарға қатысты өз үкімін шығарды.
"Энергетикалық сусындарды жиі қолдану ағзаға (жүрекке, жүйке жүйесіне, қан қысымының жоғарылауына, қант диабетіне, семіздікке, аяқ-қолдың діріліне, тағы сол секілді) қауіпті екені медицина тұрғысынан нақтыланған. Сондықтан мұсылман адамға мұндай сусындардан аулақ болғаны дұрыс", – делінген ҚМДБ хабарламасында.
Ғұламалар кеңесі энергетикалық сусындарды алкогольды және алкогольсыз түрлеріне қарай таразылаған және соған орай шешім шығарған:
- Сусынның құрамында шариғатта тыйым салынған нәрселер болмаса, оны қолдануға рұқсат.
- Алкогольды энергетикалық сусындарды ішу – харам.
- Энергетикалық сусындарды жиі қолданудың ағзаға қауіпті екені медицина тұрғысынан нақтыланған болса, оны қолдануға тыйым салынады.
Оқи отырыңыз:
- Энергетик сусынға тыйым: Оны оқушылардың 12 пайызы күн сайын ішеді
- Қазақстанда әрбір оныншы адамның бүйрегі ауырады. Бұған энергетик пен газды сусындардың қандай қатысы бар
- Дәрігер: Энергетиктер семіздікке шалдықтырып, жүрек тоқтауына алып келеді
Еске салайық, биылғы шілдеде президент Қасым-Жомарт Тоқаев Қазақстанда 21 жасқа толмаған азаматтарға энергетикалық сусын сатуға тыйым салатын заңға қол қойды.
Заң 2025 жылғы 1 қаңтардан бастап күшіне енеді.
