Еңбек және халықты әлеуметтік қорғау министрі Тамара Дүйсенова мәжіліс депутатының айлық есептік көрсеткіш өлшемін қолданудан бас тарту туралы ұсынысына пікір білдірді.
"Конституцияға сәйкес, мемлекет тарапынан кепілдендірілген жәрдемақылар бар. Мемлекеттің мүмкіндігіне қарай, көмек көрсетілетін әлеуметтік қолдаулар бар. Сондықтан да атаулы әлеуметтік көмек бойынша күнкөріс деңгейін 2025 жылдан бастап медиандық табыс есебінен анықтаймыз. Ал зейнетақы бойынша базалық зейнетақыларды өсіріп жатырмыз, 2028 жылға қарай ең төменгі еңбекақыға ауыстыру мәселесін қарастырып жатырмыз", – деді министр.
Оқи отырыңыз: Тамара Дүйсенова: Диплом – біліктілік деңгейінің көрсеткіші емес
Министрдің айтуынша, мүмкіндігі шектеулі азаматтарға берілетін мемлекет тарапынан кепілдендірілген базалық жәрдемақылар күнкөріс деңгейінің есебінен немесе медиандық табыс есебінен немесе ең төменгі жәрдемақы есебімен беріледі.
"Мемлекет тарапынан кепілдендірілген барлық жәрдемақы көтеріледі. Себебі, ол азаматтың ең негізгі табыс көзі. Оған қосымша қандай да бір статусқа ие болса, онда ол азаматтарға мемлекет тарапынан қосымша арнаулы жәрдемақы беріледі. Ол АЕК есебінен есептелетін болады. Ол мемлекеттің қаржылай мүмкіндігіне байланысты беріледі. Ал АЕК жыл сайын инфляция есебінен көтеріліп отырады. Сондықан АЕК есептік көрсеткіш ретінде әлеуметті қосымша қолдау ретінде қалатын болады", – деді министр.
