Елордада ерекше білім беру қажеттіліктері бар балалар арасында "Тең мүмкіндіктер" республикалық балалар спорт фестивалі өтті. Үш күнге созылған жарысқа еліміздің 20 өңірінен 291 бала қатысты. Олардың 97-сі ерекше білім беру қажеттіліктері бар балалар.
Фестиваль аясында бүлдіршіндер бочча, "Көңілді старттар" және жеңіл атлетикадан бақ сынады. Сайыстар балалардың спорттық қабілеттерін көрсетуге, командалық жұмыс пен өзара қолдауды дамытуға мүмкіндік берді.
Фестивальге Қазақстан жеңіл атлетика федерациясының бас хатшысы Келбет Нұрғазина мен Бочча федерациясының президенті Мәулен Әшімбаев қатысты.
Сондай-ақ балаларды қолдап бокстан Лондон Олимпиадасының чемпионы Серік Сәпиев келді. Жарыс соңында қатысушылар мен жеңімпаздар арнайы сыйлықтармен марапатталды.
Фестивальдің басты мақсаты – балалардың спортқа қызығушылығын арттыру, өзіне деген сенімін нығайту және достық қарым-қатынасты қалыптастыру. Сонымен қатар шара әр баланың спортпен айналысуына тең мүмкіндік жасауға және инклюзивті спортты дамытуға бағытталды.
Астана балалары жеңіл атлетика ойындарына қатысты
Ғұсман Қосанов атындағы турнирде Қазақстанның жеңіл атлеттері топ жарды