Ақтөбе облысының Қандыағаш қаласында өткен банкеттен кейін 102 адамның жаппай улану фактісі бойынша қылмыстық іс қозғалды. Бұл туралы облыстық полиция департаменті хабарлады.
Құқық қорғау органдары Қазақстан Республикасы Қылмыстық кодексінің 304-бабы – "Санитариялық қағидаларды немесе гигиеналық нормативтерді бұзу" бойынша сотқа дейінгі тергеп-тексеруді бастады.
Полицияның мәліметінше, қазіргі уақытта оқиғаның барлық мән-жайын жан-жақты, толық әрі объективті анықтауға бағытталған қажетті тергеу әрекеттері жүргізіліп жатыр.
"Сотқа дейінгі тергеп-тексеру нәтижесі бойынша қолданыстағы заңнамаға сәйкес процессуалдық шешім қабылданады", – делінген полиция хабарламасында.
Алғашқы адамдар медициналық көмек сұрап, 19 маусым күні жүгінген. Жалпы 102 адам өздерін жайсыз сезінгенін айтқан. Олардың 34-інен сальмонеллез диагнозы анықталған.
Анықталғандай, зардап шеккендердің барлығы Қандыағаштағы "Тұмар" мейрамханасында өткен банкетке қатысқан.
Қазіргі уақытта өңірдің денсаулық сақтау басқармасы эпидемиологиялық тексеру жүргізіп, жаппай уланудың себептерін анықтап жатыр.
