АҚШ-та режиссер Роб Райнер мен оның жұбайының өліміне байланысты ұлына айып тағылды

АҚШ-та 32 жастағы Ник Райнерге ата-анасын – әйгілі актер әрі режиссер Роб Райнерді және оның жұбайы, фотограф Мишель Райнерді өлтірді деген айып тағылды. Бұл туралы The Guardian басылымы хабарлады.

Тергеу деректеріне сәйкес, Ник Райнерге аса ауырлататын мән-жайлармен бірінші дәрежелі кісі өлтіру бабы бойынша екі бірдей айып тағылған. Сондай-ақ оған қылмыс жасау кезінде суық қару қолданғаны үшін қосымша айып та қойылды. Күдікті 16 желтоқсанда, сейсенбі күні сот алдына шығып, мәлімдеме жасауы тиіс болған. Алайда медициналық себептерге байланысты оны уақытша ұстау изоляторынан сотқа жеткізу мүмкін болмады. Айыпталушының адвокаты Алан Джексон журналистерге оның қорғауындағы азамат медициналық рұқсат алмағанын және сәрсенбіге дейін сот отырыстарына қатыспайтынын мәлімдеді.

Егер Ник Райнер кінәлі деп танылса, оған өлім жазасына дейінгі жаза тағайындалуы мүмкін. Дегенмен, прокуратура әзірге ең ауыр жаза түрін талап ете ме, жоқ па – бұл жөнінде нақты шешім қабылдамаған.

Оқи отырыңыз: Батыс Қазақстан облысында жол апатынан үш адам қаза тапты

Лос-Анджелес округінің прокуроры Натан Хохман бұл оқиғаны аса ауыр әрі қоғамды есеңгіреткен қылмыс деп бағалады. Оның айтуынша, Роб Райнер өз заманының ең көрнекті режиссерлерінің бірі болған, ал жұбайы Мишель Райнермен 35 жылдан астам уақыт бірге өмір сүрген. Прокурор отбасылық зорлық-зомбылыққа қатысты істердің ең күрделі әрі жан ауыртатын қылмыстар қатарына жататынын атап өтті.

Отбасыға жақын таныстарының айтуынша, қылмысқа дейін бір күн бұрын Роб пен Ник Райнер арасында жанжал болған. Los Angeles Times басылымына сұхбат берген отбасы досы олардың Рождествоға арналған кеште, комик Конан О’Брайеннің үйінде сөзге келіп қалғанын жеткізген. Оның сөзінше, Мишель Райнер ұлының психикалық жағдайына алаңдаған.

Қайғылы оқиғаға АҚШ-тың бұрынғы президенті Барак Обама да пікір білдірді. Ол Роб Райнердің кино мен теледидар саласындағы еңбегі миллиондаған көрерменге ұмытылмас туындылар сыйлағанын атап өтті. Обаманың айтуынша, режиссер шығармашылығының өзегінде адамгершілік пен мейірімге деген терең сенім жатқан.

Ал экс-президент Дональд Трамптың бұл қылмысқа қатысты әлеуметтік желідегі мәлімдемесі қоғамда үлкен сынға ұшырады. Ол Truth Social платформасында Роб Райнердің өлімін өзінің атымен байланыстырып, режиссерді "Трампқа қатысты психологиялық тұрақсыздық синдромының" құрбаны деп атаған. Бұл сөздер америкалық қоғамда, тіпті республикалық партия өкілдерінің арасында да наразылық тудырды.

Оқи отырыңыз: Қытай Еуропалық одақтан импортталатын етке бес жылдық баж салығын енгізді

Айта кетейік, Роб Райнер мен оның жұбайы Мишель Сингер Райнер 14 желтоқсан күні Лос-Анджелестің Брентвуд ауданындағы өз үйлерінен өлі күйінде табылған. Алдын ала мәлімет бойынша, екеуі де пышақ жарақатынан көз жұмған. Күдікті ретінде олардың ұлы Ник Райнер ұсталды. Тергеу амалдары жалғасып жатыр.