Android жүйесін ойлап тапқан Энди Рубин енді роботтар шығаруды жоспарлап отыр

Android операциялық жүйесін әзірлеп, іске қосқан Энди Рубин Genki Robotics деген атаумен жаңа стартапты қолға алды. Қазір команда жинақтау және роботтардың алғашқы прототиптерін әзірлеу жұмыстары жүріп жатыр.

Google компаниясында ұзақ жыл жұмыс істеген Энди Рубин жаңа стартапты жүзеге асыратын компанияны Жапония астанасы Токио қаласында тіркеген. Genki жапон тілінен аударғанда "жарқын" деген мағынаны береді.

Еске салайық, Энди Рубин Google компаниясында робот техникасы бөліміне жетекшілік еткен. Ол жапониялық гуманоидтар шығаратын Shaft компаниясын сатып алуға да бастамашы болған.

Әзірге белгілі деректер бойынша, Энди Рубин жапондық робототехника инженерлерінің кең резервін және университеттердің талантты мамандарын әдейі пайдаланып отыр. Бұл шешім оның Shaft сияқты компанияларда жұмыс істеген тәжірибесіне негізделген және инжинирингтің алдыңғы қатарлы нарығынан мүмкіндіктер іздеу талпынысы болуы мүмкін.