Алматы метросы қайта жұмыс істей бастады, деп хабарлады қала әкімдігі.
"Қазіргі уақытта электр жарығы берілді, метроның жұмысы қайта жанданды. Пойыздардың қозғалысы қалыпты режимде жүріп жатыр. Жолаушылардан уақытша қолайсыздықтар үшін кешірім сұраймыз және түсіністік танытқандарыңызға алғыс білдіреміз", – делінген хабарламада.
Сағат 15:11-де жарық өшіп қалғандықтан, метро жұмысын уақытша тоқтатқан болатын. Осы уақыт аралығында бекеттерге кіру және шығу жабылды.
Оқи отырыңыз: KEGOC электр жарығының толық қалпына келтірілгенін мәлімдеді
Бүгін, 14 тамызда Алматыда және Қазақстанның басқа да қалаларында жарық жаппай өшіп қалды. KEGOC компаниясы сағат 14:37-де елдің бірыңғай электр энергетикалық жүйесінде технологиялық іркіліс болғанын хабарлады. Энергетика министрлігі сағат 17:37-де электрмен қамтамасыз ету толық қалпына келтірілгенін мәлімдеді.