Air Astana әуе паркінде қанша Airbus ұшағы бар

Air Astana тобының флотында жалпы саны 59 Airbus әуе кемесі бар. Олардың ішінде 41 ұшақ A320/A321neo әулеттік, ал 18-і A320/A321ceo әулеттік ұшақтары. Бұл мәліметті Air Astana Airbus әуе кемелерін пайдалана бастағанына 20 жылтолуына орай жариялады. 

Компания мәліметінше, алғашқы Airbus A320 ұшағы 2006 жылғы ақпанда жеткізілді, содан бері флот айтарлықтай ұлғайып, бүгінде пайдаланудағы әуе кемелерінің саны 60-қа жуықтады.

"Жуырда Air Astana акционерлері жолаушыларға қолайлы, тиімді әрі заманауи флотты сақтауға бағытталған ұзақ мерзімді стратегия аясында A320 әуе кемелер тобының қосымша 25 ұшағын сатып алуды мақұлдады", – делінген хабарламада. 

Air Astana Airbus әуе кемелеріне алғашқы тікелей тапсырысын 2008 жылы жасап, су жаңа ұшақтарды 2012-2013 жылдары қабылдады. Бұл - Қазақстан тәуелсіздік алғаннан бері елдегі әуе тасымалдаушы тарапынан берілген алғашқы тікелей Airbus тапсырысы болды. 

2016 жылғы қарашада әуекомпания алғашқы Airbus A320neo ұшағын пайдалануға енгізіп, отын тиімділігі жоғары әрі экологиялық көрсеткіштері жақсартылған жаңа буын әуе кемелеріне көшкен әлемдегі алғашқы операторлардың бірі атанды. 

2019 жылғы қыркүйекте компания флоты алғашқы Airbus A321LR ұшағымен толықты. Бұл ұшақтар маршруттық желіні кеңейтуге және тар фюзеляжды әуе кемелерімен ұзақ қашықтықтағы рейстерді орындау мүмкіндігін арттыруға жол ашты. Air Astana-ның A321LR ұшақтары әлемдегі ең ұзақ тікелей тар фюзеляжды бағыттардың бірі – Алматыдан Лондонға рейсін орындайды, оның ұшу ұзақтығы шамамен тоғыз сағат.