31 наурызда Қазақстан аумағының басым бөлігінде ауқымды антициклонның әсерінен жауын-шашынсыз, тұрақты ауа райы сақталады, деп хабарлайды "Қазгидромет".
Алайда Батыс Қазақстан және оңтүстік өңірлерде атмосфералық фронттардың өтуіне байланысты ауа райы құбылып, найзағай ойнап, жаңбыр жауады. Кей жерлерде нөсер жаңбыр күтіледі.
Синоптиктер республика бойынша бірқатар қолайсыз құбылыстарды да болжады. Батыс аймақтарда тұман түссе, оңтүстік пен орталық өңірлерде жел күшейеді. Ал оңтүстік-шығыста шаңды дауыл болуы ықтимал.
Өрт қаупі де жоғары деңгейде сақталады. Атап айтқанда, Қызылорда облысының шығысында, Түркістан облысының батысында, Қостанай облысының оңтүстігінде және Жетісу облысы аумағында құрғақ әрі желді ауа райы өрт шығу қаупін арттыруы мүмкін.
Мамандар тұрғындарды ауа райындағы өзгерістерді ескеріп, қауіпсіздік шараларын сақтауға шақырады.