"1941 жылдың жазы" әскери драмасы 21 сәуірде отандық кинопрокатқа шығады

21 сәуір режиссер Бекболат Шекеровтің "1941 жылдың жазы" атты әскери драмасы  отандық кинопрокатқа шығады, деп хабарлады Ұлттық киноны қолдау мемлекеттік орталығы.

"1941 жылдың жазы" – Ұлы Отан соғысына арналған алғашқы ауқымды көркем фильм. 1991 жылдан кейін Қазақстанда бұл тақырыпта шағын киножобалар мен телевизиялық сериалдар ғана түсірілген болатын.

"Фильмде екі негізгі ой бар, көрерменге оны барынша жеткізуге тырыстым. Біріншісі – қазақтар мен қазақстандықтардың бұл соғысқа қатысуы туралы. Себебі, бұл барлық 15 республиканың ортақ Отаны еді, ол үшін бәрі де бірдей жандарын қиды. Екіншісі – фильмді кеңестік киноның ең жақсы дәстүріне сай қылып жасау, яғни соғыс туралы, бірақ, соғысқа қарсы", – деді режиссер Бекболат Шекеров.

---

Оқи отырыңыз: Алматыда Ұлы Отан соғысының ардагерлеріне 1 миллион теңгеден төленеді

---

Картинадағы басты рөлді Азамат Нығманов сомдады. Ол бірнеше әскери драмада, оның ішінде "28 панфиловшылар" атты кинотаспада рөл сомдаған.    

Фильмнің түсірілімі соғыс кезінде фашистермен ең қатал шайқастар орын алған жерлерде өтті. Негізгі түсірілім орындары Беларусьте болса, кейбір көріністер Алматы облысында түсірілген.