1 маусымда Халықаралық балаларды қорғау күніне орай Астана мен Алматыда мерекелік іс-шаралар өтеді. Бұл жолы Астана әкімдігі мерекеге ерекше дайындалып, бағдарламаны балалардың жас ерекшеліктеріне қарай бірнеше бағытқа бөлген. Сондай-ақ, бірнеше театр жас көрермендеріне балаларға арналған қойылымдарын ұсынады.
Информбюро порталы Астана мен Алматыда балаларға арналған мерекелік іс-шаралар тізімін ұсынады.
Астана
Елордада мерекелік бағдарлама алты блоктан тұрады. Әрқайсысы белгілі бір жас санатындағы балалардың қызығушылығына сай әзірленген.
"Бесік әлемі" блогы
Үш жасқа толмаған бүлдіршіндерге арналған. 1 маусым күні Жастар саябағында дәстүрлі "Арба FEST" арбалар шеруі өтеді. Ал Президент саябағында еңбектейтін сәбилерге арналған "Шапшаң бөбек" спорттық жарысын тамашалауға болады. Сондай-ақ қала саябақтарында "Бақыт мекені" отбасылық фотоаймақтары мен "Бала әлемі" дамытушы ойын алаңдары ұйымдастырылып, мерекелік көңіл күй сыйлайды.
"Балапан әлемі" блогы
Үш жас пен алты жас аралығындағы балаларға арналған. 25 мамыр мен 1 маусым аралығында кішкентай астаналықтарға судағы, көшедегі және интернеттегі қауіпсіздік ережелері қарапайым форматта түсіндірілетін танымдық әрі ойын іс-шаралары өтіп жатыр.
1 маусым күні III Халықаралық клоундар фестивалі өтеді. Сағат 12.00-де фестивальге қатысушылар "Бәйтерек" монументі маңынан бастап Ғашықтар саябағына дейін шеру жасайды. Саябақ "Хан Шатыр" сауда ойын-сауық орталығының қарсы бетінде орналасқан. Ал сағат 17.00-де Амфитеатрда фестиваль әртістерінің қатысуымен концерт өтеді.
Дәл осы күні сағат 10.00-ден 18.00-ге дейін қалалық емханалар балаларды тіс дәрігерлерінің профилактикалық тексеруінен өткізу бойынша ашық есік күнін ұйымдастырады.
"Білім мен арман әлемі" блогы
7-10 жас аралығындағы балаларға арналған. 1 маусым күні сағат 12.00-де Кірпішті тұрғын алабында дәстүрлі "Көңілді старттар" басталса, бір сағаттан кейін осындай іс-шара Өндіріс тұрғын алабында ұйымдастырылады.
Сағат 15.00-де "Хан Шатыр" сауда ойын-сауық орталығында балалар сән көрсетілімі өтеді. Сағат 10.00-де №64 мектеп-лицейінде "Әлем балалар көзімен" атты ашық аспан астындағы шығармашылық байқау ұйымдастырылады.
Осы күні Техникалық және көркем шығармашылық орталығында балалар жұмысының көрмесі мен "Баршаға қуаныш сыйлаймыз" шеберлік сабақтары өтеді. Сонымен қатар сағат 10:00-де Қалалық алаңда концерттік бағдарлама ұйымдастырылады.
Оқи отырыңыз: ЛОР, педиатр, стоматолог: Алматыда балалар мен жасөспірімдерге тегін медициналық көмек көрсетіледі
"Жас өркен" блогы
11-14 жас аралығындағы балаларға арналған.25 мамыр мен 1 маусым аралығында сағат 11.00-де Орталық саябақта, Президент саябағында және "Жетісу" саябағында "Бақытты балалық үшін" іс-шарасы өтіп жатыр. Оның аясында балаларға суда, көшеде және интернетте өзін ұстау ережелері, жарақат пен қауіпті жағдайлардың алдын алу жолдары түсіндіріледі.
29 мамыр күні сағат 16.00-де Есіл жағалауындағы Амфитеатрда "Жасыл ел" жазғы еңбек маусымының салтанатты ашылуы өтеді.
25-31 мамыр аралығында қалалық полиция департаменті балаларға кинологиялық орталыққа экскурсия ұйымдастырады.
Сағат 10.00-де М. Өтемісұлы атындағы Оқушылар сарайы алаңында "Bala energy" open-air фестивалі өтеді. Осы уақытта "АRQA ALAN" ұлттық спорт түрлерін дамыту орталығында "Ethno Games АрқаLan" фестивалі ұйымдастырылады.
"Болашаққа қадам"
Жасөспірімдерге арналған блок. 1 маусым күні елордада "Astana FIDA Drone Soccer Championship" халықаралық дрон-футбол чемпионаты өтеді. Сағат 11.00-ден 15.00-ге дейін Амфитеатр сахнасында "QosymshaFest" фестивалі ұйымдастырылады. Осы уақытта әкімдік алдындағы қалалық алаңда опера және балет театрымен бірлескен "Түрлі-түсті мозайка" байқауы өтеді.
"Бақытты отбасы"
Бұл – отбасылық құндылықтарға арналған ең ауқымды блок.
31 мамыр мен 3 маусым аралығында елорданың алты ауданының балалары арасында "Көңілді старттар" жарыстары ұйымдастырылады.
1 маусым күні сағат 9.00-де Орталық саябақтағы шаңғы-роллер трассасында Халықаралық балаларды қорғау күніне арналған отбасылық спорттық Kids RUN жарысы басталады.
Осы күні Президент саябағында жас отбасылар "Отбасы – бақыт мекені" сурет салу курсына қатыса алады. Іс-шара сағат 11.00-де басталады. Бір сағаттан кейін Ailand отбасылық демалыс орталығында мерекелік концерт өтеді.
Промышленный, Интернациональный, Мичурино және Күйгенжар тұрғын алаптарындағы қоғамдық кеңістіктерде сағат 11.00-ден бастап балаларға арналған концерттер мен интерактив бағдарламалар өтеді.
Сағат 11.00-ден 13.00-ге дейін Президент саябағында ойындар, байқаулар мен аниматорлар қатысатын мерекелік бағдарлама ұйымдастырылады.
Сағат 11.00-ден 12.00-ге дейін Қоғамдық қор "Ерекше мерекелер" қатысуымен ерекше білім беру қажеттіліктері бар балалардың концерті өтеді. Одан кейін осы жерде "Bolashak" инклюзивті театрының сән көрсетілімі ұйымдастырылады.
Сағат 11.00-де Орталық саябақта, Ұлттық теннис орталығы маңында "Bala Fest" балалар спорттық ойындары фестивалі басталады.
Театрлар
Жас көрермен музыкалық театры сағат 11.00-де балаларға "Наурыз-думан" қойылымын ұсынады. Билет бағасы 1500 теңгеден басталады.
Жастар театры болса "Су перизаты" қойылымын ұсынады. Билет бағасы – 1000 теңгеден бастап.
Әзірбайжан Мәмбетов атындағы мемлекеттік драма және комедия театры "Маугли" қойылымын сахналайды. Бір күнде екі сеанс бар: 11.00 және 15.00-де. Билеттер 500 теңгеден басталады.
"Синтез" іздестіру-эксперименталдық театры жас көрермендерге "Күлшеқыз" қойылымын ұсынады. Билеттер 4000 теңгеден басталады.
"Қазақконцерт" сағат 19.00-де "Алдар көсе" мюзиклын қояды. Билеттер мың теңгеден басталады.
Алматы
Алматыда Әлия Молдағұлова мен Мәншүк Мәметова атындағы скверде сағат 11.00 "Балаfest-2026" атты балалар фестивалі өтеді.
Наурызбай ауданындағы Амфитеатрда 1 маусымда мерекелік концерт пен балаларға арналған кино көрсетілім өтеді. Сахнада Мемлекеттік қуыршақ театры да өнер көрсетеді.
1 маусым 10.00 мен 14.00 аралығында Әуезов ауданында "Family Park" демалыс саябағында "Балалық шақ – бақыт мекені" атты мерекелік аудандық концерттік іс-шара өтеді. Мереке "Family Park" кіреберісінде ертегі кейіпкерлері мен бойшаң қуыршақтар қатысуымен өтетін флешмобпен басталып, мерекелік шерумен жалғасады. 11.00-де балалар мен жасөспірімдерге арналған Н.Сац атындағы Мемлекеттік академиялық орыс балалар мен жасөспірімдер театры "Алақай! Демалыс! Театр!" атты театрландырылған қойылымын қояды. Мерекелік концерттең соң Сарыарқа скверінде шеберлік сағаттары мен спорттық ойындар басталады. Іс-шара аясында театрландырылған қойылымдар, аниматорлар, флешмобтар, сурет байқаулары, қыш өнері бойынша шеберлік сабақтары, спорттық жарыстар және балаларға арналған түрлі ойын-сауық бағдарламалар ұйымдастырылады.
Oi-Qaragai Mountain Resort-та 1 маусым күні мерекелік іс-шаралар өтеді. Бағдарламада шеберлік сабақтары, фотозона, арқан саябағы, кино көрсетілім, атпен серуендеу және квест бар. 1 маусымда 15 жасқа дейінгі балаларға таңдаулы іс-шаралар тегін болады.
Atakent Mall-да роботтар мен суперқаһармандар музейіне баруға болады. Мұнда балалар сүйікті кейіпкерлерін көре алады. Алпыстан астам бірегей мүсіннің әрқайсы қолдан жасалған авторлық жұмыс. Олардың барлығы қайда өңделетін заттардан жасалып, өнер туындысына айналған. Билет құны – 2000 теңге.
Алматыдағы балмұздақ пен тәттілер музейі де келушілерді күтеді. Мекенжайы – Жібек жолы даңғылы 66. Билет бағасы 3699 теңгеден басталады.
1 маусымда сағат 15.00 және 18.00-де Кенжехан базары жақта Шапито циркі "Мұз және Жалын" атты шоуы өтеді. Билеттер 3000 теңгеден басталады.