Кrisha.kz Қазақстандағы қазір қолжетімді жеңілдетілген ипотека түрлерін ұсынды. 

Қазақстанда жеңілдетілген несиемен алуға болатын екі ипотека түрі бар:

  • "2-10-20" – бұрынғы "Бақытты отбасы";
  • "5-10-20" – бұрынғы "Шаңырақ".

Бұлар мемлекеттік бағдарлама болғандықтан, сыйақы мөлшерлемесі басқаларға қарағанда төмен. Бағдарлама бірінші рет пәтер сатып алғысы келетін азаматтарға арналған. 

Бұл екі бағдарламаның кез-келгеніне қатысу үшін келесі шарттарды орындау қажет:

  1. Қатысушы мен оның отбасы мүшелерінің атында соңғы бес жылда пәтер тіркелмеген болуы тиіс.
  2. Пәтерге мұқтаж азаматтардың тізімінде тұруы тиіс. Кезекке Kezekte сайты арқылы тіркеле алады. 

"2-10-20" бағдарламасы:

  • 2% – сыйақы мөлшерлемесі;
  • 10% – алғашқы жарна;
  • 20 жыл – несиелеу мерзімі.

Оқи отырыңыз: "30/70" тұрғын үй несиесі: Қалай 90 млн теңгеге дейінгі сомада ипотека алуға болады?

Әлеуметтік осал топтағы пәтерге аса мұқтаж азаматтарға арналған:

  • ата-анасының қамқорлығынсыз қалған балалар, жетім балалар;
  • көп балалы аналар мен көп балалы отбасылар;
  • І және ІІ топтағы мүгедектігі бар азаматтар;
  • мүгедектігі бар бала бағып отырған немесе асырап отырған отбасылар.  

"5-10-20" бағдарламасы

  • 5% – несие мөлшерлемесі;
  • 10% – алғашқы жарна;
  • 20 жыл – несиелеу мерзімі. 

Қалған кезекте тұрған барлық азаматқа, дәлірек толық емес отбасы, мемлекеттік және бюджет қызметкерлеріне арналған. 

Екі бағдарлама үшін де ортақ:

  • азамат кезектің қалай жылжып жатқанын БАҚ-тан немесе осы бағдарламаның операторы Отбасы банкінің сервисінен көре алады;
  • үміткер белгіленген уақытта otbasybank.kz платформасында құжат тапсырады;
  • іріктелген соң төлем жасау қабілеті тексеріледі;
  • алғашқы жарнаның бір бөлігін тұрғын үй сертификатымен өтеуге болады. Оны алу үшін Отбасы банкі ипотеканы мақұлдаған соң әкімдікке өтінім беру қажет;
  • тұрғын үйді әркім otbasybank.kz арқылы және өз өңірінде іздейді.

Оқи отырыңыз: 35 жасқа дейінгі жұмысшылар қалай арзан пәтер жалдай алады? 7 сұраққа жауап

Тек III, IV санаттағы, аумағы 80 шаршы метрден аспайтын үйді ғана сатып алуға болады. Бұл әкімдік арнайы өзі салған немесе сатып алған үйлер. Пәтердің 1 шаршы метрінің құны белгіленген:

  • Алматы мен Астанада – 290 мың теңгеден;
  • Атырау мен Маңғыстау облыстарында – 240 мың теңгеден;
  • Шымкент, Қостанай, Түркістан, Қарағанды және Ұлытау облыстарында – 220 мың теңгеден;
  • ШҚО, БҚО, Қызылорда және Абай облыстарында – 200 мың теңгеден;
  • Ақтөбе, Ақмола, Алматы, Павлодар, СҚО, Жамбыл және Жетісу облыстарында 180 мың теңгеден аспайды. 

Мұнымен қатар, сыйақы мөлшерлемесі 7% болатын Ұлттық банк ұсынған, мемлекет жартылай араласатын "7-20-25" бағдарламасы. Алайда оның көмегімен пәтер табу және несие рәсімдеу қиын. 

Сондай-ақ, "Отбасы банктің" сыйақы мөлшерлемесі 5 пен 11,5% арасындағы, алғашқы жарна 30-50% болатын бірнеше ипотека түрі бар. 

Оқи отырыңыз: 2,5 пайызбен 27 млн теңге: Ауыл тұрғындары қалай шағын несие ала алады?

Қазақстандағы қалған ипотекалар коммерциялық банктерге тиесілі, олардың жылдық мөлшерлемесі 17-22%.