Air India және Air Astana компаниялары кодшер келісімге қол қойып, Үндістан мен Қазақстан арасындағы әуе қатынасын жаңа деңгейге шығарды. Екі елдің ұлттық тасымалдаушылары арасындағы бұл серіктестік Алматы қаласын Үндістанның ең ірі хабтары – Делимен және Мумбаймен байланыстырады. 

Келісім аясында Air India компаниясы Air Astana-ның Үндістан бағытындағы рейстеріне өзінің “AI” кодын қояды. Бұл жолаушыларға бір билетпен сапар шегуге, жүкті соңғы межелі орынға дейін тіркеуге және үздіксіз саяхат жасауға мүмкіндік береді.

Жаңа кодшер әріптестік биылғы көктемде қол қойылған интерлайн келісімінің жалғасы болып отыр. Интерлайн келісім бір бағытта бірнеше әуекомпаниямен саяхат жасауға жол ашса, кодшер – толыққанды бірлескен маршруттарды іске қосуға мүмкіндік береді. Air India бас директоры Кэмпбелл Уилсон келісімнің маңызын атап өтті.

"Air Astana-мен жаңа кодшер серіктестік Қазақстанмен әуе қатынасын айтарлықтай кеңейтеді. Бұл тек туризм ғана емес, екі ел арасындағы сауда және мәдени алмасуды дамытуға да ықпал етеді", – деді Кэмпбелл Уилсон.

Air Astana тобының бас директоры Питер Фостер де пікір білдіріп, Үндістанды компания үшін стратегиялық маңызды бағыт ретінде атады:

"Air India – Үндістанда кең желісі бар, сенімді серіктес. Бұл кодшер келісім екіжақты бизнес, туризм және білім беру ағынын жеделдетеді", – деді ол.

Оқи отырыңыз: Ұшақ билетіндегі қатені қалай түзетуге болады

Codeshare келісім жолаушыларға Алматыға ғана емес, одан әрі Астана (Қазақстан), Бішкек (Қырғызстан), Ташкент (Өзбекстан), Душанбе (Тәжікстан) және Үрімжі (Қытай) бағыттарына да қол жеткізуге жол ашады. Air Astana өз кезегінде Air India-ның 18 ішкі және 9 халықаралық бағытына шығуға мүмкіндік алады.

Бұл келісім Үндістан мен Орталық Азия арасындағы өсіп келе жатқан сұранысқа жауап ретінде қабылданып отыр. Қазақстан, әсіресе Алматы қаласы, аймақтағы транзиттік хабқа айналып келеді. Сарапшылар мұны Үндістан үшін маңызды стратегиялық бағыт деп бағалап отыр.