"Астана Опера" театры сахнасында атақты өнер қайраткерлері бас қосып, аңызға айналған әнші Бибігүл Төлегенованы мерейтойымен құттықтады, деп хабарлады Мәдениет және ақпарат министрлігінің баспасөз қызметі. 

Концертке Шахимардан Әбілов, Айгүл Үлкенбаева, Альфия Каримова, сонымен қатар Зарина Алтынбаева, Толқын Забирова, Самал Бәйсейітова, Айзада Омарова және Нұрғалым Аманбай сынды көптеген танымал әртістер қатысты.

Бибігүл Төлегенова. Фото: Мәдениет және ақпарат министрлігі

Кеш Ахмет Жұбанов пен Латиф Хамидидің "Абай" операсынан "Тойбастар" жарқын көрінісімен басталды. Бибігүл Төлегенова байқауының лауреаттары Расул Жармағамбетов пен Татьяна Вицинская, "Астана Опера" хоры, оркестрі мен балет труппасы дирижер, "Құрмет" орденінің кавалері Руслан Баймурзиннің жетекшілігімен бүкіл концертке мерекелік шырай қосты.

Сондай-ақ Қазақстанның еңбек сіңірген қайраткері Нұрлан Өнербаевтың мәнерлеп оқуындағы Фариза Оңғарсынованың "Бибігүл – ән" өлеңі кештің көркіне айналды. Мерейтой иесінің шәкірті, Қазақстанның еңбек сіңірген қайраткері Толқын Забированың орындауындағы Латиф Хамидидің "Бұлбұл" әйгілі әні барша халықтың сүйіспеншілігі ретінде қабылданды. Бұл ән Бибігүл Төлегенова шығармашылығында әлдеқашан бейресми символға айналған еді.

Бибігүл Төлегенова. Фото: Мәдениет және ақпарат министрлігі

"Ата толғауы" қазақ биін орындаған "Астана Балет" труппасы ерекше сый-сияпат жасады. Көрермендер "Forte Trio" аспаптық ансамблінің орындауындағы қазақ әндерінен попурриді де ықыласпен қабылдады.

Бибігүл Төлегенованың сіңірген еңбегі мен шеберлігіне деген құрметтің белгісі ретінде оған ҚР президенті Қасым-Жомарт Тоқаевтың атынан гүл шоқтары табыс етілді.

Оқи отырыңыз: