Таяу Шығыстағы тұрақсыз жағдай мен өңірде енгізілген шектеулерге байланысты FlyArystan әуе компаниясы Ақтау – Дубай – Ақтау бағыты бойынша рейстер кестесіне өзгеріс енгізді, деп хабарлайды компанияның баспасөз қызметі.

Әуекомпанияның мәліметінше, ұшу қауіпсіздігін қамтамасыз ету мақсатында аталған бағыттағы рейстер 2026 жылғы 31 наурызға дейін уақытша тоқтатылады. Бұған дейін бұл бағыттағы рейстер аптасына екі рет — сейсенбі және сенбі күндері орындалып келген.

"Күші жойылған рейстердің жолаушыларына әуе билеттерінің толық құны айыппұлсыз қайтарылады немесе сапарды басқа күнге тегін қайта брондау мүмкіндігі ұсынылады. Ол үшін билетті сатып алған орынға жүгіну қажет", – делінген хабарламада.

Оқи отырыңыз: FlyArystan-ға қол жүгінің артық салмағына байланысты тергеу жүріп жатыр

Әуекомпания өкілдері өңірдегі жағдайды бақылауды жалғастырып жатқанын және авиациялық билік органдарымен тұрақты байланыста жұмыс жүргізіп отырғанын атап өтті.

Күші жойылған рейстерге қатысты қосымша ақпаратты жолаушылар FlyArystan әуе компаниясының байланыс орталығы, WhatsApp қызметі, ресми сайты немесе мобильді қосымшасындағы онлайн-чат арқылы ала алады.