Астана әуежайында ұшу-қону жолағын жөндеу жұмыстары мерзімінен бұрын аяқталды. Енді әуежай тәулік бойғы жұмысын қайта жалғастырады, деп хабарлайды әуеайлағының баспасөз қызметі.

Әуежай жөндеу жұмыстарына байланысты мамыр айынан бастап түнде жабылған болатын.

"5 қазаннан бастапсағат 1.00-де аэродром қайтадан штаттық режимде жұмыс істейді. Негізі барлық жұмыс 24 желтоқсанда аяқталады деп жоспарланған болатын", – дейді әуе айлағы.

Әуежайдың баспасөз қызметі жөндеу жұмыстарының толық аяқталмағанын, бірақ бұл рейстерге әсер етпейтінін мәлімдеді.

Оқи отырыңыз: Құрылысы 5 жылға созылған Шымкент әуежайының жаңа терминалы қашан іске қосылады

"Жүргізілген жұмыстар барысында ауданы 26 746,64 шаршы метр магистральдық жолдағы асфальтбетон жабыны ауыстырылды. Сондай-ақ ауданы 53 920 шаршы метр ұшу-қону жолағындағы асфальтбетон жабыны ауыстырылды. Мердігер орындайтын қалған кішігірім жұмыстар әуе рейстерінің жұмысына әсер етпейді", – деді елорда әуежайы өкілдері.