"Жұмабектің бажасымын": Полиция майоры қызметінен босатылды

8 наурызда Түркістан облысы Отырар ауданында Lada Priora көлігін тізгіндеген жүргізуші жол ережесін өрескел бұзып, қарсы жолаққа шығып кеткен болатын. Бұл қылығынан соң оны Отырар аудандық полиция басқармасының қызметкерлері тоқтатқан. Алайда, ер адам полицияның нұсқауына бағынбай, "Жұмабектің бажасымын" деген сөзді айтып, оқиға орнынан қашып кеткен еді.

Бұл видео әлеуметтік желіде лезде тараған болатын. Әсіресе, "Жұмабектің бажасын" оңайлықпен жіберіп, қол қусырып қарап тұрған полицейлердің қылығы жұрттың ашуын келтірген. Кейін "Жұмабектің" кім екені белгілі болды. Ол Отырар аудандық полиция басқармасы әкімшілік полиция бөлімінің бастығы Жұмабек Төлеген болып шықты. Ол тәртіптік комиссияның шешімімен қызметінен босатылды.

"ҚР Мемлекеттік қызметкерлердің әдеп кодексі тармақшаларымен полиция стандарттарын бұзғаны үшін Түркістан облыстық Полиция департаментінің тәртіптік комиссиясы шешімімен Отырар аудандық полиция бөлімінің әкімшілік полиция бөлімшесінің бастығы, полиция майоры атқарып отырған лауазымынан босатылды", – деді облыстық ПД ресми өкілі Салтанат Қарагөзова.

Оқи отырыңыз: Карантин кезінде блок бекетте жантүршігерлік жол апатын жасаған алматылық экс-полицейге үкім шықты

Дегенмен, осы оқиғаға қатысты әлеуметтік желілерде түрлі мемдер пайда болды. Желі қолданушылары "Жұмабектік бажасы" біраз уақыт жұрттың талқысында болатынын айтады.

 

 

 

 

 

Посмотреть эту публикацию в Instagram

 

 

 

 

 

 

 

 

 

 

 

Публикация от @kris_p_kz +21 | 🇰🇿Kz (@kris_p_kz)

Айта кетсек, полиция қызметкерлері сол күні өзін "Жұмабектің бажасы" ретінде таныстырған жүргізушіні қуып жетіп, Lada Priora көлігін айып тұрағына қойған. Автокөлік иесіне қатысты полиция қызметкерлері Әкімшілік кодекстің екі бабымен хаттама толтырды:

• 596-бабы (Көлік құралын жолдың жүру бөлігінде орналастыру, қарсы жүріп өту немесе басып озу қағидаларын бұзу);
• 613-бабы (Ішкі істер органдары қызметкерінің талаптарын орындамау, алкогольдік, есірткілік және уытқұмарлық масаң күйін куәландырудан өтуден жалтару).

Жиналған материалдар заңды процессуалдық шешім қабылдау үшін сотқа жіберілді. Сондай-ақ, медициналық тексеру нәтижесінде жүргізушінің алкогольдік ішімдік ішпегені анықталған.