Алматыда жұма күні мешіттерде жұма намазын оқу кезінде намазхандардың жол үстінде құлшылық етіп, жол қозғалысына бөгет болуының белең алуына байланысты Алматы Орталық мешіті қала халқына үндеу жасады.
Мешіт басшылығының мәлімдеуінше, Исламда жол үстінде намаз оқуға тыйым салынған.
"Пайғамбарымыз (с.ғ.с.) жеті жерде намаз оқуға тиым салған. Олар: қоқыс жиналған жерде, мал соятын орында, қабір басында, жолдың үстінде, моншада, мал суарылатын орында және қағбаның үстінде. Жол үстінде намаз оқудан тиым салуының басты себебі, жол қозғалысына кедергі келтірмеу болып табылады. Ол көшемен жедел жәрдем көлігі, өрт сөндіру көлігі немесе жұмысына асыққан адам жүретіні белгілі. Сондықтан 5 минутқа көшені жауып намаз оқу қаншама ұзын-сонар көше көптелісін туындатады", – делінген хабарламада.
Осыған орай, мешіт басшылығы жұма намазын оқу кезінде жолды жауып, басқа адамдарға зиян тигізуге болмайтынын ескертті.
"Сол себепті, баршаңызды намазға ертерек келіп, тиісті көрсетілген орындарға жайғасуды, жолдарды жаппауды, көліктерді де дұрыс орынға қоюды, талап пен тәртіпті қатаң сақтауларыңызды сұраймыз", – деп хабарлады Алматы Орталық мешітінің баспасөз қызметі.
