"Заң бәріне бірдей емес пе?". Блогер Ерболат Жанәбілов сотта мәлімдеме жасады

Астана қаласында блогерлер Ерболат Жанәбілов пен Эльмира Төлегенова ісі бойынша сот процесі жалғасып жатыр.

Кезекті сот отырысында Ерболат Жанәбілов басқа блогерлердің лотерея ұйымдастырғаны үшін жауапкершілікке тартылғанын білмегенін мәлімдеді.

Оның айтуынша, ол жұбайымен бірге шамамен 10 рет Қытайға барған. Сапар барысында оларды Асет Акбар бірге ертіп жүрген. Кейін олар өз тәжірибесін оқырмандарымен бөлісіп, шетелге бара алмайтындар үшін оқыту курстарын жасауды ұйғарған.

Жанәбіловтің сөзінше, курстарды түсіру процесін Сұңғат Утебулатов ұйымдастырған. Ол жұбайы Маржанмен бірге монтаж, студия және реквизит жұмыстарымен айналысқан.

Курстар Қытаймен байланысты түрлі платформаларда жарияланып, онда жеткізушілерді табу, тауарға тапсырыс беру және отбасылық бюджетті үнемдеу жолдары түсіндірілген. Блогер платформалардың интерфейсі негізінен қытай тілінде екенін, ал аударма ішінара ғана қолжетімді екенін атап өтті. Лотереяларға қатысты сұрақтарға жауап бере отырып, Жанәбілов бұл идеяны Сұңғат Утебулатов ұсынғанын айтты. Оның айтуынша, Утебулатов бұған дейін басқа блогерлермен жұмыс істеп, курстарды жарнамалауда осындай тәсілді қолданған.

Жанабылов өзіне қатысты тағылған айыптарға байланысты басқа блогерлердің әкімшілік жауапкершілікке тартылғаны туралы білмегенін жеткізді.

"Дархан Жолшыбек, Нұрбек Нұртаза, Сұңғат Утебулатов мені басқа блогерлердің жауапқа тартылғанын білген деп отыр. Бірақ мен оны қайдан білуім керек? Бұл туралы ақпарат біздің іс бойынша резонанс болғаннан кейін ғана шықты. Сондықтан Сұңғаттың сөзі шындыққа жанаспайды", – деді ол.

Сонымен қатар ол Дархан Жолшыбек туралы тек салық төлеу жайлы стористерін көргенін, ал жауапкершілікке тартылу себебін салыққа байланысты деп ойлағанын айтты.

Ал Нұрбек Нұртазамен тек әріптес ретінде таныс болғанын, тығыз байланыс болмағанын жеткізді. Оның айтуынша, Нұртаза айыппұлды қоғамда резонанс туындағаннан кейін ғана төлеген.

Жанәбілов басқа блогерлерге қатысты әкімшілік айыппұлдар туралы тек сот барысында білгенін атап өтті. Сонымен қатар, кейбір тұлғалар кінәсін мойындамағанымен, оларға қатысты қылмыстық іс қозғалмағанын айтты.

"Дархан да кінәсін мойындамады, бірақ оған қатысты қылмыстық іс болған жоқ. Ал менің жағдайымда іс қозғалды. Бұл резонансқа байланысты ма? Заң бәріне бірдей емес пе?", – деді ол.