Ұлттық банк Қазақстанда құрастырылған көліктерді жеңілдетілген несиемен беруді қаржыландыруды тоқтатты

Осыған байланысты қазақстандықтар су жаңа көліктерді 20-30 пайыздық жылдық мөлшерлемемен несиеге рәсімдеп жатыр, деп хабарлады 31-арнаның Информбюро ақпараттық бағдарламасы.

2015 жылы Қазақстанда құрастырылған көліктерді жеңілдетілген несиемен беруді қаржыландыру мақсатында 87 млрд теңге қаралса, оның 40 млрд теңгесі Ұлттық банк есебінен бөлінген.

Оқи отырыңыз: Ұлттық банк қазақстандық көліктерді несиелеу бағдарламасын бекітті. Оның шарттары қандай?

"Аталған бағдарламаның қызметін тоқтату туралы 24 мамырда Ұлттық Банк Қаулы шығарды. Осыған байланысты бұл бағдарлама аясында қосымша қаржыландыру қарастырылмаған. Бөлінген 40 млрд. теңге жаңартпалы кредиттік желі негізінде айналымда болады",– дейді Қазақстан Даму Банкінің ресми өкілі Жанар Жұмабекова.

Қаржыгерлердің айтуынша, жеңілдетілген несие беру жаңартпалы қаржыландыру жүйесінде жүргізіледі. Яғни, бір жеке тұлғаның өтелген берешегі екінші деңгейлі банктер арқылы келесі жеке тұлғаны қаржыландыруға жұмсалады.

Мамандардың айтуынша, жеңілдетілген несие алуға сұраныс жоғары. Бірақ, банктер айналымда қаражат болған жағдайда ғана жаңа өтінімдерді қабылдай алады.

Материалдың толық нұсқасын төмендегі видеодан көріңіз: