TikTok Қазақстанда жасанды интеллектіні қауіпсіз әрі жауапкершілікпен пайдалануға арналған білім беру бастамасын іске қосады. Платформа пайдаланушыларға ЖИ көмегімен жасалған контентті тануға және технологияны дұрыс қолдануға арналған жаңа құралдар мен нұсқаулықтар ұсынады.
Жоба аясында TikTok медиа сауаттылық саласындағы білім беру қауымдастығы NAMLE және ЖИ мәселелері жөніндегі сарапшы Генри Айдермен бірлесіп жаңа нұсқаулық әзірледі. Онда ЖИ құралдарын жауапкершілікпен пайдалану және жасанды интеллект көмегімен жасалған контентті ажырату бойынша ұсыныстар берілген.
Сонымен қатар платформада пайдаланушылар ЖИ көмегімен жасалған контентті тануға арналған жаңа білім беру хабы іске қосылды. Онда жасанды интеллект арқылы жасалған бейнероликтерді қарапайым контенттен ажырату және мұндай материалдарды арнайы белгілеу жолдары түсіндіріледі.
TikTok ЖИ спамына қарсы шараларды да күшейтпек. Платформа жасанды интеллект көмегімен көп мөлшерде спам жариялайтын аккаунттарды анықтау жүйелерін сынап жатыр. 2026 жылдың бірінші тоқсанында TikTok бүкіл әлем бойынша 86 миллионнан астам жалған аккаунтты жойған.
Платформа ЖИ көмегімен жасалған контенттің ашықтығын арттыру үшін Content Credentials жүйесін және басқа да технологияларды қолданады. Қазір TikTok-та 3 миллиардтан астам бейнеролик жасанды интеллект көмегімен жасалған контент ретінде белгіленген.
TikTok бұл бағыттағы бағдарламаларды дамытуға 4 миллион доллардан астам қаражат бөлген. Компанияның мәліметінше, 2025 жылдың қарашасында іске қосылған бағдарлама аясындағы ЖИ туралы білім беретін контент 200 миллионнан астам қаралым жинаған.
Әлеуметтік желідегі қауіпті трендтер: Хайп қуғандар неге айыппұлдан қорықпайды