Қазақстан сыртқы істер министрлігінің ресми өкілі Айбек Смадияров министрлікте өткен жедел брифинг барысында Таяу Шығыстағы жағдайға қатысты түсініктеме берді.
"Біз барлық қатысушы тараптарды бейбіт тұрғындар арасындағы құрбандықтан аулақ болу және аймақтағы толыққанды соғысты тудыруы мүмкін жағдайдың одан әрі нашарлауына әкелетін кез келген әрекеттен бас тартуға шақырамыз. Осыған байланысты келіспеушіліктерді тек БҰҰ Жарғысы мен халықаралық құқық қағидаттары шеңберінде саяси-дипломатиялық жолмен шешу үшін жедел шаралар қабылдаудың маңыздылығын атап өтеміз", – деді министрліктің ресми өкілі Айбек Смадияров.
Айбек Смадияровтың айтуынша, Қазақстан жағдайды тұрақтандыруға және өңірлік қауіпсіздікті қамтамасыз етуге бағытталған халықаралық қоғамдастықтың бастамаларына өзінің тұрақты қолдауын растайды.
