Отбасыны4 жылуын сақтап, бала тәрбиесін алға қоя отырып, жеке кәсіпті дөңгелету – екінің бірінің қолынан келе бермейтін қажырлы еңбек. Десе де, мемлекет тарапынан көрсетілетін жүйелі қолдау тетіктерін тиімді пайдаланып, тағдырын өз қолымен өзгерткен жандар қатары жыл санап артып келеді. Осындай жасампаздықтың жарқын үлгісін Шымкент шаһарының тұрғыны, көпбалалы ана Күмісай Кайыпова көрсетіп отыр. Ол тұрмыстық қиындықтарға мойымай, мемлекеттік гранттың игілігін көріп, бүгінде өз ортасында табысты кәсіпкерге айналды.
Сәтсіздіктен сәтті жобаға дейін: Алғашқы қадам
Күмісай Серікқызының бұл кәсіпке келу жолы оңай болған жоқ. Ол 2025 жылдың тамыз айына дейінгі уақытта отбасының жан басына шаққандағы орташа табысы ең төменгі күнкөріс деңгейінен, яғни кедейшілік шегінен аспағандықтан, мемлекет тарапынан берілетін атаулы әлеуметтік көмекке тәуелді болып келді. Алайда үнемі көмекке қол жайып отыруды құп көрмеген ана өзінің сүйікті ісі – нан өнімдерін пісіруді үлкен кәсіпке айналдыруды армандады.
Осы мақсатта ол өткен жылдың үшінші легінде бизнес-жоспарын дайындап, 400 айлық есептік көрсеткіш көлеміндегі қайтарымсыз мемлекеттік грантқа өтінім берді. Арнайы құрылған комиссия мүшелерінің алдында өз жобасын еш қобалжусыз, зор сеніммен қорғап шықты. Талапты үміткердің іске деген құлшынысын, нарықтағы сұранысты нақты есептегенін және осы саладағы азды-көпті іс-тәжірибесін жоғары бағалаған комиссия жобаның өміршеңдігіне көз жеткізіп, грант бөлу туралы бір ауыздан оң шешім қабылдады.
Оқи отырыңыз: Үкімет әр отбасының табысы мен шығынын цифрлық жүйе арқылы қадағалайтын болады
Тұрмыстық пештен заманауи өндіріске: Кәсіптің жаңа тынысы
Мемлекеттен бөлінген грант қаражаты Күмісайдың отбасылық кәсібін мүлдем жаңа белеске көтерді. Қаржы қолға тиісімен кәсіпкер ана істі іркіліссіз бастап кетті. Ол бұл қаражатқа ең алдымен нан өнімдерін жоғары сапада әрі тез пісіретін арнайы өндірістік пеш, қамырды біркелкі илейтін заманауи құрылғы, гигиеналық талаптарға сай жұмыс үстелдері мен нан пісіру ісіне аса қажетті басқа да қосымша жабдықтарды сатып алды.
"Инфрақұрылымның жаңаруы өнім көлемінің бірнеше есе артуына тікелей ықпал етті. Мәселен, бұған дейін Күмісай үйдегі қарапайым шағын пештің көмегімен күніне небары 30-40 таба нан пісіріп, оны тек көрші-қолаң мен жақын маңдағы шағын дүкендерге ғана өткізіп келсе, қазір жағдай түбегейлі өзгерді. Жоғары технологиялық құрылғылардың арқасында наубайхананың өндірістік қуаттылығы артып, тәулігіне 80-нен 150-ге дейін ыстық нан пісіру деңгейіне жетті. Бұл – отбасы табысының еселеп артуына ғана емес, сонымен қатар бір адамды тұрақты жұмыс орнымен қамтуға мүмкіндік берген үлкен жетістік. Бүгінде Күмісайдың наубайханасы өз өнімдерінің сапасымен жергілікті тұтынушылардың жүрегінен жол тауып, Шымкент нарығында өз орны бар берекелі кәсіп орындарының біріне айналып отыр", – деді Шымкент қаласының Жұмыспен қамту және әлеуметтік қорғау басқармасындағылар.
Шымкенттегі мемлекеттік қолдау: Өтінім қабылдау жалғасуда
"Күмісай Кайыпованың бұл жетістігі – жекелеген бір ғана мысал емес, бұл Шымкент қаласында жүзеге асырылып жатқан әлеуметтік саясаттың нақты әрі жемісті нәтижесі. Ресми мәліметтерге сүйенсек, Шымкент шаһарында 2025 жылдың қорытындысы бойынша арнайы комиссияның шешімімен әлеуметтік осал топқа жататын 431 азаматқа өз ісін бастау үшін 400 АЕК көлемінде қайтарымсыз мемлекеттік гранттар үлестірілген болатын. Ал ағымдағы 2026 жылы да бұл игі бастама өз жалғасын тауып, тағы 400 үміткерге осындай мемлекеттік қолдау көрсету жоспарланып отыр", – деді Шымкент қаласының Жұмыспен қамту және әлеуметтік қорғау басқармасындағылар.
Ерекше атап өтерлігі, дәл қазіргі уақытта жаңа бизнес-идеяларды қолдауға бағытталған мемлекеттік грантты алу үшін кезекті өтінімдерді қабылдау науқаны қызып тұр. Үміткерлердің құжаттары 2026 жылдың 24 маусымы мен 8 шілдесі аралығында электронды түрде business.enbek.kz бірыңғай порталы арқылы қабылдануда.
Оқи отырыңыз: 3 шілдеден бастап докторантураға түсуге құжат қабылдау басталды: қандай құжаттар қажет
Заңнамалық талаптарға сәйкес, бұл гранттар қоғамның қолдауға ең көп зәру бөлігіне бағытталған. Атап айтқанда, байқауға келесі санаттағы азаматтар қатысып, бағын сынай алады:
- көпбалалы отбасы мүшелері;
- атаулы әлеуметтік көмек (АӘК) алушы азаматтар;
- ерекше мұқтаждығы бар бала тәрбиелеп отырған ата-аналар;
- асыраушысынан айрылуына байланысты әлеуметтік төлем алатын тұлғалар;
- денсаулығына байланысты еңбек етуге қарсы көрсетілімдері жоқ, мүгедектігі бар азаматтар.
Мемлекеттің мұндай қайтарымсыз көмегі – әлеуметтік көмекке иек сүйеп отырған отбасылардың өз бетінше табыс тауып, қоғамның белсенді мүшесіне айналуына берілген үлкен мүмкіндік. Кейіпкеріміз Күмісайдың ісі дәлелдегендей, ниет пен еңбек ұштасқан жерде мемлекет қолдауы кез келген отбасының әл-ауқатын көтеруге қауқарлы.