Қаржылық мониторинг агенттігінің Шымкент қаласы бойынша департаменті "Bingo-37" және "Lotoboom" онлайн-платформалары арқылы заңсыз ойын бизнесін ұйымдастыру дерегі бойынша тергеуді аяқтады. Бұл туралы ҚМА баспасөз қызметі хабарлады.
Алаяқтар адамдарға WhatsApp мессенджері арқылы құмар ойындарға қатысу туралы ұсыныстар жіберіп отырған. Өтініш білдірген адамдарға аккаунт ашылып, логин мен пароль берілген, сондай-ақ ақша аударуға арналған шот деректемелері жолданған.
Ақша қабылдау және ұтыстарды төлеу үшін 14 дроппердің атына ашылған банк шоттары пайдаланылған.
Екі онлайн-казиноның жалпы айналымы 3,1 млрд теңгені құрады. Қылмыстық жолмен алынған кіріске ұйымдастырушылар 200 млн теңгеден астам сомаға мүлік сатып алған. Оның ішінде BYD Destroyer, LiXiang L6 Max, Chevrolet Monza, SsangYong Rexton маркалы автокөліктер, сондай-ақ екі жер учаскесі бар.
Сот үкімімен екі адам 4 жылға бас бостандығынан айырылды. Аталған мүлік мемлекет кірісіне тәркіленді.
Үкім заңды күшіне енген жоқ.
Алматыда үш интернет-казиноның заңсыз төлем жүйесі әшкереленді
Алакөл, Каспий, Бурабай. Қазақстанда шетелдіктерге арналған казино ашылатын аумақтар белгіленді