Сапарбай Жұбаев: "Самұрық-Қазына" активінің ЖІӨ-дегі үлесін 10-15 пайызға түсіру керек

Сапарбай Жұбаев "Самұрық-Қазына" қоры қызметінің тиімділігіне қатысты Qazaqstan арнасындағы "Ашық алаң" бағдарламасында пікір білдірді. 

"Кезінде Кеңес дәуірінде барлығы мемлекеттікі болды. Одан жекешелендіруге, яғни нарықтық заманға өту үшін өтпелі кезең керек еді. Сингапур, Малайзия, Тайвань сияқты елдер сол өтпелі кезеңде мемлекеттік басқарудағы кәсіпкерлікті дамытты. Мемлекет өзі инвестиция жасап, оларды жоғары көтерді. Бізде электр, көлік, уран, мұнай саласын мемлекет қолына алды. Бәрін бірден жекешелендіріп жіберместен мемлекет өзі табыс тауып, оларды дамыту үшін инвестиция жасады", – деді эконмист.

Оқи отырыңыз: Президент: "Самұрық-Қазына" қоры қайта құрылмаса, ел экономикасына ол қажет емес

Алайда Сапарбай Жұбаев квазимемлекеттік сектордың тиімділігі күмән туғызатынын айта кетті. 

"Олар мемлекет үшін емес, кейбір соның басшығында отырғандардың қалтасы үшін жұмыс істеп жатқандай көрінеді. Әрине, президентіміз "Самұрық-Қазына" қорының активі ЖІӨ-нің 60%-ына жуықтайды деп жатыр. Бұл өте нашар жағдай. Дамыған мемлекеттердің ұйымы "мемлекеттің үлесі 10-15 пайызға түспегенше сендерді қабылдамаймыз" дейді. Біз қаншалықты дамығанымызбен ол мемлекеттердің қатарына қосыла алмаймыз. Сондықтан оны 10-15 пайызға түсіру керек. Ол үшін квазимемлекеттік компанияларды құртып жіберу керек емес. Оларды жекешелендірсек ең бірінші шағын және орта бизнес дамиды", – деді сарапшы.