Шымкентте кәсіпкерді қорқытып, ірі көлемде ақша бопсалаған күдікті ұсталды, деп хабарлайды Polisia.kz.
Тергеу мәліметінше, күдікті қоғамдық тамақтану орындарының біріне бірнеше рет барып, нысанды бейнежазбаға түсірген. Кейін кәсіпкерге түрлі уәкілетті органдар арқылы "тексеру ұйымдастырамын", бизнесін жаптырамын деп қысым көрсеткен. Осы әрекеттер арқылы ол кәсіпкерден 20 миллион теңге талап еткені анықталды.
"Жедел-іздестіру шаралары нәтижесінде күдікті қолға түсіп, уақытша ұстау изоляторына қамалды. Аталған дерек бойынша бопсалау фактісімен қылмыстық іс қозғалып, сотқа дейінгі тергеу амалдары жүргізіліп жатыр", – делінген хабарламада.
Полиция азаматтарға ескерту жасады: ешбір тұлға тексеру жүргіземін немесе ақпарат таратамын деп қорқытып, ақша талап етуге құқылы емес. Мұндай жағдайға тап болған жағдайда құқық қорғау органдарына дереу хабарласу қажет.