Журналист, продюсер Индира Тұрсынбай "Balapan" телеарнасының директоры қызметіне тағайындалды, деп хабарлады "Қазақстан" РТРК" АҚ баспасөз қызметі.
"Қазір Balapan телеарнасының алдында тұрған негізгі міндет – балалар контентін өндірушілер арасындағы бәсекелестікте алда болу, анимация өндірісін кеңейту. Ол үшін ең алдымен өнімдер сапасын бұдан әрі арттыру мақсаты тұр. Бүгінде балалар контентін өндіретін түрлі отандық және әлемдік жаңа платформалар пайда болды, бәсекелестік мықты болғандықтан, телеөндірісте креативті идеяларды іске асыру маңызды", – деді корпорацияның басқарма төрайымы Ләззат Танысбай.
Ол бұған дейін телеарнаға жетекшілік еткен Қымбат Досжанға алғыс білдірді.
Индира Тұрсынбай 2003 жылдан бері Qazaqstan, "Астана", "Евразия", Almaty телеарналарында жүргізуші, журналист, жаңалықтар тілшісі болып еңбек еткен. Соңғы жылдары жеке продакшн компанияларда басшылық қызметтер атқарған.
Оқи отырыңыз: Ақпарат министрі: Балаларға жекеменшік теле не YouTube арна ашылса, оған тек қуанамыз
