Тікелей эфир

Қазақстанға ҰҚШҰ-ның қанша әскері мен техникасы келді

Қазақстанда ұжымдық қауіпсіздік туралы шарт ұйымының ұжымдық бітімгершілік күштерінің 2 030 адамы мен 250 техникасы орналасты.

Қазақстан президенті сессия қатысушыларына елімізде қалыптасқан ахуал мен оны тұрақтандыру үшін қабылданып жатқан шаралар туралы мәлімет берді. Сондай-ақ, ол елге ҰҚШҰ-ның қанша әскері мен техникасы келгенін айтты.

"Шын мәнінде, ҰҚШҰ-ға мүше мемлекеттердің бірінің қауіпсіздігін, тұрақтылығы мен тұтастығын қамтамасыз ету үшін ұйымның бітімгерлік күштерінің ауқымды түрде жұмылдырылу жағдайы бірінші рет болып отыр. Біз үшін ҰҚШҰ бойынша әріптестеріміздің әскери ғана емес, моральдық қолдау көрсетуі де аса маңызды. Ұйымға мүше мемлекеттердің бәрі біртұтас майдан болып, Қазақстанның үндеуін бірауыздан қолдады. ҰҚШҰ беделді әскери-саяси ұйым ретінде өзінің қажетті әрі тиімді екенін көрсетті. Бұл мемлекеттеріміздің тұрақтылығы мен қауіпсіздігін қамтамасыз ететін нақты механизм", – деді мемлекет басшысы.  

Президент ұжымдық бітімгершілік күштері қандай міндеттер атқаратынын да атап өтті.

"Бүгінгі таңда ұжымдық қауіпсіздік кеңесінің шешіміне сәйкес Қазақстан Республикасында ұжымдық қауіпсіздік туралы шарт ұйымының ұжымдық бітімгершілік күштерінің 2 030 адамы мен 250 техникасы орналасып, жүктелген міндеттерді орындауға кірісіп кетті. Олар әуежайлар, әскери қоймалар және өзге де стратегиялық нысандарды қорғау және қауіпсіздігін қамтамасыз ету қызметін жүзегі асырады", – деді мемлекет басшысы ҰҚШҰ ұжымдық қауіпсіздік кеңесінің кезектен тыс сессиясында.

Саммит барысында ҰҚШҰ-ға мүше мемлекеттер басшылары Қазақстан Республикасындағы жағдай жөнінде пікір алмасып, еліміздің басшылығы жасап жатқан іс-әрекеттерді қолдайтынын айтты. Сондай-ақ тұрақтылық пен конституциялық тәртіпті қалпына келтірудің маңызды екеніне назар аударды. ҰҚШҰ бас хатшысы Станислав Зась бірлесе қабылдаған шешімдердің жүзеге асырылу барысы туралы баяндады.

Мемлекеттер басшылары ҰҚШҰ ұжымдық бітімгерлік күштерінің Қазақстандағы миссиясы аяқталғанша тұрақты байланыста болуға уағдаласты. 

Бұл мақала сізге пайдалы болды ма?
0

  Егер мәтінде қате болса, оны белгілеп, Ctrl+Enter батырмасын басыңыз

  Егер мәтіндегі қатені смартфонда көрсеңіз, оны белгілеп, «Қатені хабарлау» батырмасын басыңыз

Біздің Telegram-каналдағы ең көп оқылған жаңалықтар
Серіктестер жаңалықтары