Жетісу облысына Ұжымдық қауіпсіздік туралы шарт ұйымына (ҰҚШҰ) мүше елдердің әскери қызметшілері келді. Қорғаныс министрлігі олардың өңірде бірлескен оқу-жаттығуға қатысып жатқанын мәлімдеді.
Жетісу облысындағы "Көктал" оқу-жаттығу полигонында Қазақстан, Қырғызстан, Ресей және Тәжікстан әскери қызметшілерінің қатысуымен бірлескен оқу-жаттығу өтіп жатыр.
Қорғаныс министрлігінің мәліметінше, оқу-жаттығу 13-18 қыркүйек аралығында Қазақстан Қарулы күштері Десанттық-шабуылдау әскерлерінің қолбасшысы, полковник Мақсұт Гусейновтің басшылығымен өтуде. Оған 1500-ге жуық әскери қызметші және 300-ден астам қару-жарақ, әскери әрі арнайы техника, оның ішінде 115 ұшқышсыз ұшу аппараты тартылған.
Ведомствоның хабарлауынша, мұндай оқу-жаттығу жыл сайын өткізіледі. Оның мақсаты – Ұжымдық жедел өрістету күштерінің өзара іс-қимыл деңгейін арттырып, бірлескен міндеттерді орындауға дайындығын жетілдіру.
Практикалық іс-қимылдар таулы және шөлейт жерлердің ерекшеліктері ескеріле отырып жүргізіледі.