+4…+13°
Қазақстанда 2026 жылдың алғашқы тоғыз айында хабар-ошарсыз кеткен 17 мыңнан астам адамның жүрген жері анықталды. Сонымен қатар құқық қорғау органдары іздеу жариялаған 1 031 күдікті ұсталды. Бұл туралы Polisia.kz хабарлады.
5 қазанда басталған "Қауіпсіз үй" жедел-профилактикалық іс-шарасы барысында полиция қызметкерлері шамамен 249 мың тұрғын үй нысанын, оның ішінде 12,5 мың жалдамалы пәтерді аралап шықты. Тексеру нәтижесінде тіркеусіз тұрудың тоғыз мыңға жуық дерегі анықталып, жолы кесілді. Сондай-ақ 7 189 шетел азаматы әкімшілік жауапкершілікке тартылып, тұрақты тұрғылықты жері жоқ 2 128 адам полиция органдарына жеткізілді.
Алаяқтыққа күдіктілер Астана мен Алматыда ұсталды
Іздеуде жүргендердің арасында Астанада ұсталған 67 жастағы ер адам бар. Ол алаяқтық жасады деген күдікпен іздестірілген. Іс материалдарына сәйкес, 2018 жылы Қарағандыда ол коммерциялық ұйымның қоймасынан тауарды сату сылтауымен алып шығып, құны 401 млн теңгеден асатын мүлікті иемденген.
Полиция шетелдік құқық қорғау органдарымен бірлесіп, басқа мемлекеттерде іздеуде жүрген адамдарды да анықтап жатыр. Министрліктің мәліметінше, Қазақстан аумағында ТМД елдері мен басқа мемлекеттер іздестірген 537 адам ұсталған. Мәселен, Алматыда 45 жастағы шетел азаматы қолға түсті. Ол 1,3 млрд теңгеден астам сомаға алаяқтық жасады деген күдікке ілінген. Тергеу деректеріне сәйкес, 2023 жылы Бішкекте ол Оңтүстік Кореядан косметикалық өнімдер жеткізуді ұйымдастыруға уәде беріп, жәбірленушінің ақшасын иемденген.