Қазақстанда ерте жүктілік көрсеткіші 3 жылда 25 пайызға төмендеген

Қазақстанда соңғы 3 жылда 15-17 жас аралығындағы жасөспірімдер арасында бала босану көрсеткіші (ерте босану) 25 %-ға төмендеген (1000 жасөспірімге шаққанда ерте босану көрсеткіші 2022 жылы 3,84; 2023 жылы 3,14; 2024 жылы 2,88 құрады). Денсаулық сақтау министрлігінің бұл деректерін үкімет басшысы Олжас Бектенов сенат депутаты Нұртөре Жүсіпке берген жауабында бөлісті. 

Премьер-министрдің жауабынша, еркек пен әйел арасындағы еркін қарым-қатынас туралы ақпараттың әлеуметтік желілерде ашық көрсетілуі, жүктіліктің салдары туралы жасөспірімдер білімінің таяздығы, отбасылардағы тәрбиенің жеткіліксіздігі, сондай-ақ қыз балаларға қатысты зорлық-зомбылық – кәмелетке толмағандардың жыныстық қатынасқа ерте түсуінің негізгі себептері болып отыр.  

Бас прокуратураның деректеріне сәйкес 2024 жылы кәмелетке толмағандарға қатысты зорлық-зомбылық әрекетінің 225 фактісі тіркелді, бұл 2023 жылмен салыстырғанда 2,7 %-ға көп (219), оның ішінде сексуалдық сипаттағы 215, (237 жылы – 217), жасөспірімдерге қатысты азғындықтың 99 фактісі тіркелді (2023 жылы – 106). 

Оқи отырыңыз: Қазақстанда кәмелет жасқа толмай құрсақ көтерген қыздардың саны 1,5 есеге ұлғайған

"Сондай-ақ ересектер тарапынан, соның ішінде әлеуметтік желілерде, баланың виртуалды өмірін бақылаудың жеткіліксіздігі кәмелетке толмағандарға қатысты зорлық-зомбылықтың орын алуының бір себебі", – деген Олжас Бектенов келесі мәліметтерді ұсынды: 

2024 жылы кәмелетке толмағандардың қасында түнгі уақытта ересектердің болмағаны үшін 98 692 ата-ана әкімшілік жауаптылыққа тартылған (ҚР АІЖК 442-бабы), 8 796 ата-анаға айыппұл салынды (2023 жылы – 5 824).