Қазақстан Республикасы Еңбек және халықты әлеуметтік қорғау министрлігі елде тұрып жатқан соғыс ардагерлеріне төленетін зейнетақы көлемін жариялады.
Ведомство мәліметінше, 2026 жылғы 1 мамырдағы жағдай бойынша Екінші дүниежүзілік соғыс ардагерлеріне ай сайын орта есеппен шамамен 290 мың теңге зейнетақы төленеді. Ал соғыс кезінде мүгедектік алған азаматтар үшін бұл көрсеткіш 300 мың теңгеден асады.
"Қаржылай төлемдерден бөлек, ардагерлерге бірқатар әлеуметтік қолдау шаралары қарастырылған. Атап айтқанда, олар мемлекет есебінен шипажайларда тегін демалып, медициналық қызметтерді ақысыз пайдалана алады. Сонымен қатар, ардагерлерге тұрғын үй беру, тегін дәрі-дәрмекпен қамтамасыз ету және азық-түлік көмегін көрсету сияқты жеңілдіктер ұсынылады", – делінген хабарламада.
Бұл іс–шаралар соғыс ардагерлеріне әлеуметтік қолдауды күшейтуге және олардың өмір сүру сапасын арттыруға бағытталған.