Қазақстанда АИТВ жұқтырған еркектердің саны әйелдерден 2 есе көп

2022 жылдың қорытындысы бойынша Қазақстанда АИТВ-мен өмір сүретін 30 558  адам тұрады, деп баяндады денсаулық сақтау министрі Ажар Ғиният Үкімет отырысында. 

"Былтыр 3 877 жаңа жағдай тіркелді. 100 мың тұрғынға шаққандағы көрсеткіш 20,3 құрады. Бұл ретте еркектер әйелдерге қарағанда 2 есе көп екені (67,2%/32,8%) анықталды", – деді министр.

Ажар Ғинияттың айтуынша, вирус жұқтырғандардың 82 пайызы – 18-49 жас аралығындағы еңбекке қабілетті адамдар.

"Вирустың жыныстық жолмен берілуі басым. Ол 75 пайызды құрайды. Содан кейін инъекциялық жолмен берілу тұр. Ол 20 пайызды құрайды", – деді министр.

"Саралау нәтижелері Павлодар, Қарағанды, Солтүстік Қазақстан, Шығыс Қазақстан, Қостанай облыстарында және Алматы қаласында бес негізгі көрсеткіштің төртеуі инфекцияның таралуының неғұрлым жоғары деңгейін және облыстардың аумағында АИТВ инфекциясының жаңа жағдайларының алдын алу бойынша қабылданатын шаралардың жеткіліксіз деңгейін көрсетеді", – деді ол.