Қазақстанда 2,5 миллионнан астам адам зейнетақы алады, ал 630 мыңнан аса көпбалалы отбасы мемлекеттік жәрдемақымен қамтылған. Бұл туралы үкіметтің баспасөз қызметі хабарлады.
Мәліметке сәйкес, мемлекет басшысы Қасым-Жомарт Тоқаевтың әлеуметтік бағдарланған мемлекет құру жөніндегі тапсырмаларын жүзеге асыру аясында халықты қолдау бағытындағы жұмыстар жалғасып жатыр.
Үкіметтің хабарлауынша, қазіргі таңда 544 мыңнан астам азамат мүгедектік бойынша мемлекеттік қолдау алады. Сонымен қатар ауылдық жерлердегі шамамен бір миллион тұрғын жаңа медициналық инфрақұрылымның игілігін көріп отыр.
Білім беру саласында да көрсеткіштер артқан. Соңғы бес жылда елімізде білім гранттарының саны 93 мыңнан асқан.
"Бүгінде елімізде әлеуметтік қолдаудың көп деңгейлі жүйесі қалыптасқан. Ол тегін медициналық көмекті, мемлекеттік жәрдемақыларды, зейнетақымен қамсыздандыруды, білім мен ғылымды қолдауды, ана мен баланы қорғауды, сондай-ақ әлеуметтік тұрғыдан осал топтарға арналған арнайы бағдарламаларды қамтиды", – делінген Үкімет хабарламасында.
Оқи отырыңыз: Депутаттар ойын аттракциондарын ғимараттың 1-қабатында орнатуды сұрады. Үкімет жауабы қандай
Үкімет өкілдерінің мәліметінше, әлеуметтік қолдау шаралары қаржыландыру көлемі жағынан да, қамтылатын азаматтар саны бойынша да бұрын-соңды болмаған деңгейге жеткен.